QO'RQOQ OLDIN MUShT KO'TARAR... Haqiqatdan ham xalqimizda “Qo'rqoq oldin musht ko'tarar”degan naql bor. Bu bejiz aytilmagan. O'zi aybini yashirish, aniqroq qilib aytganda maktabda bo'layotgan ishlarni ommaga tarqalib ketishini istamagan maktab direktori Jahongir Eshonqulov va uning “tarafdorlari”  o'z haqqini talab qilib, direktorga ochiq gapirgan tibbiyot xodimi Raxmon Mavlonov ustidan shikoyat qilib prokuraturaga murojaat qilganiga nima deysiz? O'z haq-huquqini himoya qilib, mehnat qilib topayotgan oyligidan asossiz ravishda ushlab qolmasligini so'rab maktab direktori Jahongir Eshonqulov va hisobchi Jasur Omonovga ochiq gapirgan Raxmon Mavlonovning ustidan prokuraturaga shikoyat qilishdan maqsad nima? Direktor o'zining bir nechta tarafkashlari bilan birgalikda haqiqatni gapirgan insonni “o'yin”dan chiqarmoqchimi? Balki, Raxmon Mavlonov futbol maktabida faoliyatini davom etirsa boshqa qing'ir ishlari ham ochilib qolishidan qo'rqib shu ishni amalga oshirgandir. Buyog'i bizga qorong'u. Bu ham etmaganidek, futbol maktabida malakali trener kadrlar bilan ta'minlash, trenerlik faoliyatini amalga oshiruvchi shaxslarning kasbiy bilimlari va ko'nikmalarini oshirish ham shunchaki xo'jakursinga amalga oshirilmoqda. O'zbekiston Respublikasi Vazirlar Mahkamasining “Sport maktablarini malakali trener kadrlar bilan ta'minlash chora-tadbirlari to'g'risida” qarorga muvofiqq sport maktablarida faoliyat yuritayotgan murabbiylarni tayyorlash aniq qilib belgilab qo'yilgan. Biroq, maktabda murabbiylarning malakasini oshirish, ularni attestatsiyadan o'tkazish talabiga mutloqo roya qilinmagan holda ish yuritilmoqda. Xususan, o'tgan yilning sentyabr oyida Vali Xolyorov, Abror Ismatov va Durbek Abduvoitovlar attestatsiyadan o'ta olmagan. Attestatsiyadan o'ta olmagan murabbiylar O'zbekiston Respublikasi Vazirlar Mahkamasining “O'zbekiston Respublikasida trenerlik faoliyatini yanada tartibga solish chora-tadbirlari to'g'risida”gi Qarori va “Trenerlik faoliyati bilan shug'ullanish yuzasidan attestatsiya o'tkazish tartibi to'g'risida”gi nizomning 37-bandi asosida “Attestatsiyadano'tmagan jismoniy shaxs oldingi attestatsiya bo'lgan paytdan boshlab 1 (bir) oydan keyin attestatsiyadan takroran o'tish” huquqiga qilgilab qo'yilgan. biroq, oradan salkam olti oy o'tgandan so'ng Vali Xolyorov, Abror Ismatov attestatsiyadan o'tgan. To'g'ri, oradan olti oy o'tgan bo'lsada murabbiylar attestatsiyadan o'tgandir. Ammo bu vaqt oralig'ida ulargaoylik chiqarilishi mumkinmi? Axir olti oy davomida yuqorida nomlari zikr etilgan murabbiylar attestatsiyadan o'ta olishmadiku?     To'g'ri, kimdir murabbiylar har oyda attestatsiya imtihonini topshirib har topshirganda yiqilgan bo'lishi mumkin degan fikrga kelishi mumkindir, ammo attestatsiyadan to'liq o'tmasdan turib yarim yil davomida maktabda ishlash va oylik olish qaysi qonun hujjatlariga to'g'ri keladi? Amaldagi qonunlar bo'yicha attestatsiya komissiyasi tomonidan “Attestatsiyadan o'tmadi, mutaxassis lavozimiga muvofiq emas” degan qaror qabul qilsa, pedagog kadrlar navbatdan tashqari malaka oshirish kurslariga yuborilishi va qayta attestatsiyaga jalb etilishi lozim emasmi? Mana shuning o'zi kadrlar tayyorlash milliy dasturini qo'pol ravishda buzilishiga kirmaydimi? Muhtaram Prezidentimiz Shavkat Mirziyoev Vazirlar Mahkamasining mamlakatimizni 2016 yildagi ijtimoiy-iqtisodiy rivojlantirish yakunlarini har tomonlama tahlil qilish hamda respublika hukumatining 2017 yil uchun iqtisodiy va ijtimoiy dasturi eng muhim yo'nalishlari va ustuvor vazifalarini belgilashga bag'ishlangan kengaytirilgan majlisida Davlat raqobat qo'mitasining raisi D.Hidoyatovga “Davlat mulki talon-taroj qilingani uchun bugun kim shaxsan javob berishi kerak? So'zsiz va birinchi navbatda siz, qo'mita raisi sifatida javob berishingiz shart. Siz oldingi rahbarlarning xatolarini takrorlab, sustkashlik qilib va faqat statistika bilan shug'ullanib asosiy bo'g'inni – mamlakatning va xalqning boyligiga ehtiyotkorlik bilan munosabatda bo'lishni boy beryapsiz” degan tanqidiy fikrlarni bildirib o'tgandi. Xo'sh, aytingchi futbol tizimidagi bunday kamchiliklar, futbol maktablarida bo'layotgan bu kabi holatlarni nazorat qiladigan, uni tartibga oladigan tashkilot bormi? Futbolning, ayniqsa bolalar futbolining bugungi ish usuli, faqat hisob-kitob va ma'lumotlar emas, balki amaliy va tezkor chora-tadbirlar ko'rishni talab etmayaptimi? Bugun barcha soha rahbarlari kabi futbolga, uning rivojlanishiga, qolaversa bolalar sportiga, ularning salomatligiga javob beradigan rahbarlar ham o'z ish joyidan chetga chiqib, xalq bilan muloqot qilib ularning dardini, fikrlarini tinglash va inson manfaatlari ta'minlash uchun harakat qilish kerak emasmi? Qachongacha sportga, xususan futbolga mas'ul bo'lgan mutasaddi xodimlar o'z sohasidagi termin kabi “o'yindan tashqari” holatda qoladi? “Xalq bilan muloqot va inson manfaatlari yili”ning mana ikkinchi oyi ham o'tib bormoqda. Xo'sh, muhtaram Prezidentimiz Shavkat Mirziyoev 2017 yilda sport, xususan futbol bo'yicha qilingan ishlarning sarhisobini so'rasalar yana allaqanday hisob-kitoblarga to'la soxta hisobotlar o'qib beriladimi? Qisqasi savollar ko'p. Ammo bunga javob beradigan biror bir mutasaddi xodim yo'q. O'zbekiston Respublikasi Prezidentining (2016 yil 23 dekabrga qadar O'zbekiston Respublikasi Bosh vaziri) virtual qabulxonasi bugun ko'plab fuqarolarimizning muammolarini hal qilmoqda. Bugun o'z muammolari, haq-huquqlari va boshqa masalalarini hal qilish uchun fuqarolarimiz virtual qabulxonaga murojaat qilishmoqda. Savol tug'iladi, viloyat, shahar va tuman hokimliklari va boshqa tashkilotlarning viloyat bo'limlari orqali hal qilinishi lozim bo'lgan muammoni (muammolarni) qachongacha virtual qabulxona orqali hal qilamiz? Muammoni shu erning o'zida hal qilishning iloji yo'qmi? SO'NGGI SO'Z O'RNIDA... Bugun futbol va uning atrofidagi muammolar talaygina. Ayniqsa, viloyatlardagi futbol klublari, shu sport turiga ixtisoslashgan maktablardagi ahvol talab darajasida emas. Xususan, “Dinamo-plyus” PFK va uning tasarrufidagi Bolalar va o'smirlar maxsus futbol sport maktabida ham. Agar viloyatning bosh jamoasi hisoblanmish “Dinamo” va uning tasarrufidagi futbol maktabidagi bugungi holat o'z vaqtida o'rganilib, tegishli choralar ko'rilmasa bugun g'alaba nimaligini bilmayotgan “Dinamo” va Samarqand futbolining ahvoli bundanda yomonlashishi aniq. Bugun muammoni o'z vaqtida hal qilish lozim. Aks holda... Qisqacha qilib Prezidentimiz ta'biri bilan aytganda “...Ana shu ishlarning bosh maqsadi – fuqarolarning qonuniy murojaatlarini qisqa muddatda sinchiklab ko'rib chiqishni va hal etishni ta'minlashdir. Bu borada raqamlar va silliq hisobotlarning orqasidan quvib, navbatdagi kampaniyabozlikni uyushtirish kerak emas”.  Buni xalq hech qachon kechirmaydi! Farhod NORBO'TAEV
— deya xabar beradi uff.uz nashri.