2015 yilning 1 noyabr kuni Randburg shahri (JAR)da chim ustida xokkey bo'yicha erkaklar va ayollar o'rtasida Afrika chempionatlari nihoyasiga etib, 2016 yili Rio-de-Janeyro shahri (Braziliya)da o'tkaziladigan Olimpiada o'yinlarida ishtirok etadigan barcha terma jamoalar nomi ma'lum bo'ldi.
Shu tariqa, chim ustida xokkey turi “Rio-2016” o'yinlarining barcha litsenziyalari o'ynalgan dastlabki sport turi bo'ldi.
Olimpiada o'yinlarida erkaklar va alyollar o'rtasida o'tkaziladigan musobaqalarda 12tadan terma jamoalar g'oliblik uchun kurash olib boradilar. Har bir terma jamoadan 16 nafardan sportchi o'rin egallaydi.
Olimpiada o'yinlarining mezbonlari faqatgina erkaklar o'rtasidagi musobaqada ishtirok etadi. Ushbu yurtning ayollar terma jamoasi saralash bosqichida litsenziyani qo'lga kirita olmadi.
Quyida, Olimpiada o'yinlari yo'llanmasiga ega bo'lgan terma jamoalar berilgan:
Erkaklar: - Braziliya, Hindiston, Argentina, Gollandiya, Avstraliya, JAR, Germaniya, Belgiya, B.Britaniya, Kanada, Ispaniya, Irlandiya.
Ayollar: - J.Koreya, AQSh, B.Britaniya, Avstraliya, JAR, Gollandiya, Xitoy, Germaniya, Argentina, Yangi Zelandiya, Hindiston, Yaponiya.
Agarda biror-bir terma jamoa Olimpiada o'yinlarida ishtirok etishni rad etsa, u holda 2014-2015 yillardagi Jahon ligasining yarim finalchilari Yangi Zelandiya (erkaklarda) va Ispaniya (ayollarda) terma jamoalari ular o'rnini egallashadi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.