Dunyoda sportga oshno bo'lmagan insonni o'zi bo'lmasa kerak. E'tibor bersangiz, turli sohada ma'lum muvaffaqiyatga erishib jahonga tanilgan kishilar albatta yoshligida sportning biror turi  bilan shug'ullangan bo'lib chiqadi.  Quyida, sizga tanishtirmoqchi bo'lgan kasbi kinoaktyor, shoir  va boshqa nom qozongan shaxslar esa sport bilan ancha jiddiy ya'ni - professional darajada shug'ullanib  havas qilsa arzigulik  sovrinlarni qo'lga kiritganlardan:
Dolf Lundgren
Taniqli aktyor Dolf Lundgren 70-yillar oxiri karate bo'yicha Shvetsiyada uch bora chempion bo'lgan. Hatto, u sharq yakkakurashi - karate bo'yicha jahon chempionatida ham qatnashgan edi . To'g'ri, dunyo chempionligi unga nasib qilmagan bo'lsada, u o'sha paytdagi chempionga faqat ochkolar hisobida mag'lub bo'lgan. Oradan besh yil o'tib Lundgrenni barcha bokschi sifatida – professional emas, balki, kino bokschisi sifatida tanib bo'lgandi. “Rokki-4” filmidagi Ivan Drago obrazi unga katta shuhrat keltirgan. Jeyson Stetxem
Hozir internetda uni bir so'zlilik va sadoqat ramzi deb bilishadi. Taniqli aktyor nomidan kuniga yuzlab iqtiboslar yozilishini aytmaysizmi?... Jeyson Stetxem 12 yil davomida suvga sakrash bo'yicha Angliya terma jamoasi a'zosi bo'lgan. U 1990 yili Hamdo'stlik Kubogida ham muvaffaqiyatli qatnashgan edi.
Mikki Rurk
O'z davrida Mikki Rurk sakkiz marta professional ringda jang o'tkazib - oltita g'alaba va ikki bora durang natija qayd etgan. Bu vaqt davomida aktyorni orttirgani - million dollar, qo'l va burun sinishi va uzoq vaqt muvozanatni yo'qotish kasalligi bo'ldi xolos.
Yodgor Sa'diev
O'zbekiston xalq artisti Yodgor Sa'diev bir vaqtlar “Paxtakor” darvozasini golkiper sifatida qo'riqlaganini haligacha gapirib yurishadi.
- Hozir ko'proq yurishni va ozgina yugurishni yaxshi ko'raman. “Paxtakor” faxriylarining o'yiniga chaqirib turishadi, vaqtim bo'lganida borib turaman. Men futbolni tark etgan emasman, har doim birgaman. Hali ham tushlarimda “Paxtakor”ning qaysidir darvozaboni kelmay qolgan bo'ladi-yu, o'rniga darvozabon topa olmay, meni olib kelib, kiyintirib darvozabon qilib turg'izib qo'yishadi. Shu bilan uyg'onib ketaman. Bu yaxshi taassurotlar,- deydi aktyorimiz intervyularidan birida.
Ivan Dorn
Ivan Dornni haqiqiy ko'pkurashchi deyish mumkin. U elkanli suzish bo'yicha sport ustasi, bal raqsi bo'yicha esa sport ustaligiga nomzod, engil atletika turida esa uchinchi razryad egasidir.
Kurt Rassel
Bundan qirq yil ilgari Kurt Rassel xuddi otasidek professional beysbolchi bo'lishni orzu qilgan. Faoliyatida AQShning qo'yi ligalarida o'ynagan Kurt raqib bilan to'qnashuvdan so'ng elkasidan jarohat oladi va sportni tark etishga majbur bo'ladi.
Iosif Kobzon
Rus qo'shiqchisi Iosif Daviidovichni yoshligida -  kelajagi bor bokschi deb bilishardi. U o'smirlar bo'yicha Ukraina chempioni bo'lgan. Lekin, bir marta nokautga uchragach boks bilan hayrlashgan edi. To'g'ri qilgan ekan. Hozircha u sahnada biror marta ham yutqazgani yo'q.
Jan-Pol Belmondo

Jan-Pol Belmondo ham boks bilan jiddiy shug'ullanganlardan. U Parij chempionligini ham qo'lga kiritgan.

Karl Uezers

Yana bir bizga “Rokki” filmi orqali tanish aktyor yoshligida amerikacha futbolda nom qozongan edi.  U  «Ouklend Rayders» jamoasida o'ynagan. Elmurod ERMATOV tayyorladi
— deya xabar beradi uff.uz nashri.