Milliy terma jamoalarning navbatdagi o'yinlarida ham bir qator etakchi futbolchilar safdan chiqishdi. Natijada yana «FIFA virusi» masalasi baralla ko'tarildi. Chunonchi, bu safar 10 nafardan ortiq futbolchi turli muddatga chetga chiqdi. Tabiiyki, bunday holatlarda klublarning murabbiylariyu, rahbarlari FIFA, shuningdek, terma jamoalar ustozlaridan o'zgacha o'pkalashadi...
Serxio Aguero (Argentina terma jamoasi)
Jarohatlangan o'yini: Argentina-Ekvador-2:0
Jarohat: chap boldir payining lat eyishi
Tiklanish muddati: chamasi 1 oy
- Hozir faoliyatimning eng yaxshi davrlari davom etyapti, biroq ayni payt «Oltin to'p» uchun kurash shunchaki, xayol, xolos: Messi hammadan ancha ustun,-degandi argentinalik hujumchi terma jamoasi ixtiyoriga qo'shilganidan so'ng. Endi unda jahon futbolidagi eng obro'li individual sovrinni yutish imkoniyati yanada pasaydi. Serxio Ekvador termasiga qarshi bahsning 22-daqiqasida uzun uzatmadan keyin to'p uchun kurashib, maydonga noqulay yiqildi va darhol shifokorlar yordamiga muhtoj ekanligini bildirdi. Xullas, u o'sha uchrashuvni davom ettirolmadi. Ma'lum bo'lishicha, endi tiklanishi uchun chamasi 1 oy vaqt ketadi. Demak, Aguero APL va ChL doirasidagi bir qator muhim o'yinlarni chetdan kuzatishga majbur. Tabiiyki, «Siti» uning yo'qligida Rahim Sterling, Vilfrid Boni va Kelechi Ixeanachoning samarali to'p surishlariga umid bog'laydi.
Mario Gyottse
(Germaniya terma jamoasi)
Jarohatlangan o'yini: Irlandiya-Germaniya-1:0
Jarohat: boldir payining cho'zilishi
Tiklanish muddati: 10-12 hafta
JCh-2014da «oltin to'p»ga mualliflik qilgan Mario sekin-asta «Bavariya» asosiy tarkibida «temir-beton» darajada joy olayotgandi. Endi bechora hujumchi Xosep Gvardiolaga o'zining nimalarga qodirligini to'la-to'kis isbotlash urinishini sal keyinroqqa qoldirishga majbur. U irlandlarga qarshi bahsning 35-daqiqasida o'z o'rnini Andrea Shyurrlega bo'shatib berdi. Vrachlarning xulosalari - boldir payining cho'zilishi. Marioning safga qaytishi 10-12 haftaga cho'zilishini e'tiborga olsak, futbolchi uchun ChL-2015|2016 guruh raundi yakunlangani oydinlashadi.
Karim Benzema
(Frantsiya terma jamoasi)
Jarohatlangan o'yini: Frantsiya-Armaniston-4:0
Jarohat: chap boldir payining lat eyishi
Tiklanish muddati: chamasi 3 hafta
Frantsuz hujumchisi oxirgi vaqtlarda «Real»ning eng asosiy to'purari va ochko keltiruvchi a'zosiga aylanib, Krishtianu Ronaldu oldida obro'sini ancha ko'tarib olgandi. Afsuski, hammasini armanlarga qarshi o'tkazilgan o'rtoqlik o'yini buzib yubordi. Karim bu uchrashuvda 2ta gol urdi, ammo ikkinchi aniq zarbasidan so'ng maydonni majburiy tarzda tark etdi. Benzemaning safdan chiqqanidan so'ng katta janjal yuzaga kelishiga sal qoldi. Gap shundaki, «Real» hujumchining jarohatlanishi xavfi borligi xususida Frantsiya futbol federatsiyasini avvaldan ogohlantirgan ekan. Biroq Dide Desham bunga e'tiborsiz qarab, Karimni ahamiyati yo'q o'yinda baribir, maydonga tushirdi. Natijada «Qirollik klubi» 3 hafta muddatga asosiy hujumchisidan ayrildi. Tabiiyki, ispan jamoasi darhol Frantsiya termasi mutasaddilariga e'tiroz ham bildirdi. Ammo bundan nima naf?
Pol Pogba
(Frantsiya terma jamoasi)
Jarohatlangan vaqti: mashg'ulot jarayoni
Jarohat: tizzaning lat eyishi
Tiklanish muddati: chamasi 1 hafta
«Yuventus» yarim himoyachisi «Real»dagi hamyurtidan farqli o'laroq, engilgina jarohat bilan qutuldi. U Frantsiya termasi mashg'ulotlari chog'i tizzasida og'riq sezdi va shu zahoti chetga chiqdi. Tabiiyki, u armanlarga qarshi o'yinda maydonga tushmadi va tez orada terma jamoa lagerini tark etdi. Xullas, mohir xavbek tiklanish uchun atigi 1 hafta sarfladi, xolos. Ya'ni «Yuve»ning navbatdagi o'yinida bemalol 90 daqiqa harakatlandi.
David Silva
(Ispaniya terma jamoasi)
Jarohatlangan o'yini: Ispaniya-Lyuksemburg-4:0
Jarohat: tizza payining uzilishi
Tiklanish muddati: chamasi 1 oy
«Manchester Siti» pleymeykeri sentyabr oyi oxirida mushaklarga bog'liq muammo sezgani tufayli «Tottenxem»ga qarshi o'yin (unda «shaharliklar» 1:4 hisobida yutqazdilar)ni o'tkazib yuborgandi. Manuel Pellegrini bu bilan ispan futbolchisini ChL doirasida «Borussiya» (Menxengladbax) bilan bo'ladigan o'yinga asragandi, chog'i. Silva o'sha o'yinda ham «xira» ko'ringaniga qaramay, o'z klubining deyarli barcha hujumlarini boshlab berishni uddaladi. Endi oydinlashdiki, «Siti» terma jamoalar tufayli nafaqat asosiy hujumchisi - Aguero, balki asosiy dispetcheri - Silvani ham ma'lum muddatga yo'qotibdi...
Davomi InterFUTBOL gazetasi blogida.
— deya xabar beradi uff.uz nashri.