Fevral oyi ham sekin-asta tugab bormoqda. Hademay bahor boshlanadi. Unda esa, O'zbekiston futboli o'zining yangi mavsumini boshlaydi. Oliy liga o'yinlari bilan birga Osiyo Chempionlar ligasida ham klublarimiz bahslarga kirishadilar. Shu jumladan O'zbekiston termasi ham bellashuvlarni boshlaydi. Baribir o'zimizning futbol boshqacha, unga o'zgacha qaraymiz.
Yaxshi bilasiz, shu yilning 23 mart sanasida O'zbekiston milliy terma jamoasi Kuala-Lumpur shahridagi "Tuanku Abdul Rahman Stadium" o'yingohida Suriya termasiga qarshi bu yilning eng muhim uchrashuvini o'tkazadi. OFK tomonidan Suriyadagi siyosiy vaziyat tufayli terma jamoa o'yinlarini boshqa neytral xududda o'tkazishga qaror qilingan. O'sha kuni bizni judayam noqulay bo'lgan raqib va boz ustiga maydonning chimi uncha yaxshi bo'lmagan stadionda kutib oladi.
Lekin, bugun biz bu haqida yozmoqchi emasmiz. U haqida hali ko'p marotaba to'xtalib o'tamiz. Bugun e'tiboringizga bir ma'lumotni havola etamiz. O'tgan dam olish kunlari mahalliy telekanallarning birida Janubiy Koreya termasining JCh-2018 saralash bosqichidagi ishtiroki muhokama qilingan.
"Uli Shtilike shogirdlarini 2017 yilda juda muhim o'yinlar kutmoqda. Bundan 3-4 yil avval biz JCh saralashlarining bu bosqichidan bemalol o'tishimizni va hattoki 2-o'rin sohibidan bir nechta ochkoga o'tib ketishimizni bilar edik. Afsuski, endi unday deya olmaymiz. Sababi, Osiyoda futbol o'syapti. Bugungi kungi ahvolimiz bizni kutilmaganda etakchiga yoki autsayderga aylantirishi mumkin. Ha, guruhdan chiqish chiqmasligimiz oxirgi o'yinda hal bo'lishi ham mumkin.
JCh-2018 musoabqasinig 3-saralashida "Taegeuk Warriors"ga Eron, O'zbekiston va Marchelo Lippisi bor Xitoy termalari qarshilik ko'rsatadi. Endi termamiz bironta ham ochko yo'qotishga haqqi yo'q. Har qanday boshqa raqiblarimiz yuqorilash imkoni saqlanib turibdi.
Sardor Ki Son Yon va uning jamoalariga ko'p narsa bog'liq bo'ladi. Mundialga borish uchun hozirdan tayyorgarlik ko'rish kerak. Agar vaziyatni real baholaydigan bo'lsak, 5 sentyabr kunidagi o'yin Janubiy Koreyaning taqdirini hal qiladi. O'sha kuni O'zbekiston termasiga qarshi Toshkentda o'yin bo'lib o'tadi. O'rta Osiyo vakillari bu safar borlarini berishadi. Buni taxmin qilish qiyin emas.
O'zbekiston ham anchadan beri mundialni orzu qilyapti, Toshkentdagi o'yin biz uchnu oson bo'lmaydi. Lekin, ishni sentyabrgacha qoldirmaslik lozim va dastlabki to'rt o'yinda 12 ochkoga ega bo'lishimiz kerak", - deyildi mahalliy TV kanallarining birida ketgan futbolga oid ko'rsatuvda.
Ko'rib turganingizdek, guruhimizdagi barcha terma jamoa JCh-2018ga chiqishni istayapti. Lekin, bu baxt faqatgina 2ta jamoaga nasib etadi. Uchinchisini uzoq yo'lli o'yinlar kutadi.
Biz ham o'z navbatida tayyorgarlik ishlarini birpasga ham susaytirmasligimiz kerak. Eng munosiblarni tanlab olib, bosh jamoamizga jalb etishimiz lozim.
Umid qilamiz, hammasi yaxshi bo'ladi!
— deya xabar beradi uff.uz nashri.