1news.uz — Samarqandda futzal bo'yicha mamlakat chempionatining to'rtinchi tur o'yinlari o'tkazildi. Jamoalarning kuchli sakkizlikka kirish taqdirini hal etuvchi mazkur turda bir qator voqealar yuz berdiki, “aytsam tilim, aytmasam dilim”… degandek taassurot qoldirdi. Birinchi galda yurtimizda mini-futbol, bugungi kunda futzal deb atalmish jozibali sport turining asoschilaridan, shakllanishi va rivojiga salmoqli hissasini qo'shgan, bir so'z bilan aytganda, mamlakatimiz futzal jamoalarining “otaxoni”, Andijonning “Turon-S” jamoasi musobaqadan chetlatildi. Bunga sabab qilib jamoaning o'tgan uchinchi turda Toshkentga etib kela olmaganligi va yana a'zolik badallardan qarzligi ko'rsatildi. Haqiqatdan ham jamoa o'tgan turda safar bilan bog'liq mablag'ni o'z vaqtida topa olmagani uchun tur o'yinlariga kela olmadi. Tur uchrashuvlari vaqtida O'zbekiston mini-futbol assotsiatsiyasi rahbarlari boshqa jamoalar murabbiylari ishtirokida yig'ilish o'tkazib, “Turon-S”ni musobaqadan chetlatish haqida qaror qabul qilishdi. To'g'ri, qonunga barcha birdek rio qilishi zarur. Ammo qonun kim uchun, nima uchun? Xalq, inson manfaatlari uchun emasmi?  Avvallari bu kabi voqealar boshqa jamoalar tomonidan bir necha bor yuz berganligiga, mutasaddilar jamoalar ahvolidan kelib chiqib, ijobiy qarorlar qabul qilishganligiga, ancha-muncha xato va kamchiliklar, ayblar kechirilib, vaziyatga real holatdan kelib chiqib baho berilgan voqealarga ko'p bor guvoh bo'lganmiz. “Turon-S” esa kechirilmadi. Vaholanki, jamoa Assotsiatsiyadan qarzining ma'lum qismini, buning ustiga uchinchi turga kela olmagani uchun belgilangan jarima summasini Assotsiatsiya hisobiga o'tkazgandi. Qarzlarining qolgan qismini ham yaqin kunlar ichida to'lab berish uchun viloyat hokimi kafolati bilan ne umidlarda Samarqandga etib kelgan jamoani Assotsiatsiya vakillari baribir musobaqaga qo'yishmadi. Jamoa ikki kun musobaqa o'tayotgan sport zaldan nari ketmadi, Assotsiatsiya vakillaridan, nari borsa Toshkentdagi futzal mutasaddilaridan najot kutdi. Barchasi bekor ketdi, uchinchi kun deganda jamoa a'zolari ham yana ortga – Andijonga qaytdi. Xabarning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.