«Manchester Siti» - «Monako» uchrashuvidan so'ng o'tkazilgan matbuot anjumanida frantsiyaliklar bosh murabbiyi Leonardu Jardim o'yin haqida o'z fikrlarini bildirdi. - Birinchi o'rinda, bu o'yin Chempionlar Ligasidagi eng ajoyiblaridan biri bo'ldi demoqchiman. Muxlislar uchun bu haqiqiy sovg'a. Ishonchim komil ular sakkizta goldan rohat olishdi. «Monako» o'zining eng yaxshi o'yinlaridan birini o'tkazdi. Buning uchun shogirdlarimga minnatdorchilik bildirdim. Ammo himoyada kichik xatolarga yo'l qo'ydik. Shuningdek, penaltini aniq amalga oshirmay, 3:1 hisobida oldinga chiqib olish imkoniyatini qo'ldan boy berdik. «Siti» himoyachilar ortida bo'shliq qoldirishini bilgan xolda Mbappeni maydonga tushirdim. Chunki u juda tezkor. Kilian ajoyib o'yin o'tkazdi. Vaholanki yigitcha endi 18 yoshga to'ldi. Shuningdek, bu uning EChLdagi birinchi uchrashuvi. Falkao kuchli futbolchi ekanligini yana bir bor isbotladi. Lekin Aguero ham jahon darajasidagi hujumchi. Bugungi bahsda hech nima hal bo'lmadi. Oldinda yana 90 daqiqalik o'yin bor.
— deya xabar beradi uff.uz nashri.