Yaxshi bilasiz, shu yilning 23 mart kuni O'zbekiston milliy terma jamoasi Malayziya davlatida Suriyaga qarshi JCh-2018 musobaqasining Osiyo qit'asi 3-saralash bosqichida maydonga tushadi. Ingliz tilida chop etiladigan Suriya matbuotidan olingan xabarlarga qaraganda, mamlakat bosh jamoasi O'zbekistonga qarshi juda jiddiy tayyorgarlik ko'rishni rejalashtirmoqda.
Bosh murabbiy Aymon al-Hakim Suriya futbol federatsisi prezidenti Saloh Ramadondan terma jamoani ertaroq Malayziyaga yuborishini so'ragan va bunga ijobiy javobni olgan. Aniqrog'i, Suriya termasi Kuala-Lumpur shahriga bizdan ancha ertaroq etib boradi va u erda mahalliy klublardan biri bilan o'rtoqlik uchrashuvini o'tkazadi. Iqlimga moslashish, o'yin uslubini shakllantirish, raqibni o'rganish va taktik ko'rsatmalarni o'zlashtirish Suriya termasining Malayziyadagi bosh maqsadiga aylanadi.
O'zbekistonga qarshi o'yin ular uchun muhim ahamiyat kasb etishi hamda ijobiy natijaga erishish uchun bor kuchlarini berib o'ynashlari haqida ma'lumotga egamiz.
Hatto, milliy chempionat o'yinlari ertaroq yakunlashini ko'zda tutilmoqda. Suriyaliklar Eronning "Naft Tehron" jamoasi darvozaboni Ibrohim Almadan ko'p narsani kutishmoqda. Umuman, Suriya termasi 3-saralashning ikkinchi davrasida yuqori o'rinlarni ko'zlamoqda.
O'z navbatida biz ham sergak tortib, milliy termamizning tayyorgarlik ishlarini o'z vaqtida olib borishimiz kerak. Endi bu haqida ko'proq yozaveramiz, zero buyog'iga vaqt oz qolmoqda. Mart oyida O'zbekiston termasini ikkita bir-biridan muhim o'yinlar kutmoqda.
Ishonamizki, shu o'yinlardan olti ochkoni jamg'arib olamiz. Boshqacha bo'lishi mumkin emas.
— deya xabar beradi uff.uz nashri.