“Andijon”  professional futbol klubi qoshidagi Bolalar va o'smirlar futbol maktabi Andijon shahrining chetidagi bahavo Bo'ston dahasida joylashgan.
Ma'lumki, har qanday bilim dargohi o'zida ta'lim olib, ma'lum yutuqlarga erishgan tarbiyalanuvchilari bilan faxrlanadi. Futbol maktabi bitiruvchilari orasida bunday sportchilar juda ko'p. Ular qatorida milliy terma jamoamiz safida yurtimiz sharafini xalqaro maydonlarda himoya qilayotgan futbolchilar Shavkat Mullajonov, Oleg Zoteev, Vagiz Galiulin, oliy liga jamoalarida muvaffaqiyatli to'p surayotgan Artur Mamatkazin, Akbar Xo'jaev, Davron Jo'raqulov, Muhammadyusuf Abdumajidov singari ko'plab sportchilarni tilga olishimiz mumkin.
Muassasa direktori, o'z vaqtida “Paxtakor” va Olimpiya terma jamoasida to'p surgan  Bekzodbek Karimov ham futboldagi ilk qadamlarini hozirda rahbarlik qilayotgan maktabda tashlagan.
- Maktabimizdagi mavjud 58 ta guruhlarda 16 nafar tajribali murabbiylar yosh iqtidor egalari bilan shug'ullanmoqdalar, -deydi Bekzodbek Karimov. – O'tgan 2016 yil davomida tarbiyalanuvchilarimiz Respublika va viloyat   miqyosidagi musobaqalarning oltitasida g'olib va sovrindor bo'ldilar.
Futbol maktabi 2011 yili O'zbekiston futbol Federatsiyasi va Bolalar sportini rivojlantirish jamg'armasi tomonidan 1 mlrd, 564 million so'm mablag' evaziga qurilib va zamonaviy jihozlanib foydalanishga topshirilgan. Maskanda mavjud shart-sharoitlar a'lo darajada. Muhtasham uch qavatli binoda barcha qulayliklarga ega o'quv-mashg'ulot xonalari, trenajyor zallari,  yuvinish  xonalari yosh sportchilar xizmatida. Maktabda 2 ta 105x74 hajmdagi tabiiy chimli futbol maydoni yana uchta chog'roq mashg'ulot maydonchalari mavjud.
Mashg'ulot maydonida o'g'il bolalar bilan birgalikda qizlardan iborat guruh ham shug'ullanayotganiga guvoh bo'ldik. - Men Adel Raximova Andijon shahridagi  11- umumiy ta'lim maktabining 8 sinfida ta'lim olish bilan birgalikda ikki yildan buyon  futbol maktabida mashg'ulotlarda qatnashyapman. Orzuim futbolchi bo'lish.        
   
Muassasa shahardagi “Mehribonlik uyi”da ham o'z guruhlarini ochgan bo'lib, mehrga tashna 20  nafar tarbiyalanuvchilarga Sanjarbek Xoldorov murabbiylik qilmoqda.
- Viloyatimiz hokimi Shuhratbek Abdurahmonov yoshlar o'rtasida futbolni ommaviyligini oshirishga alohida e'tibor qaratmoqda,- deydi futbol maktabi direktori.
– Futbol maktabimizni – “Andijon” klubiga mahoratli o'yinchilar etkazib beruvchi futbol akademiyasiga aylantirishni maqsad qilganmiz. Hozirda, qo'shimcha 60 o'rinli yotoqxona va qish mavsumiga suniy qoplamali maydonning smeta-loyihalari tayyorlanmoqda.
Bu loyihalardan ko'zlangan maqsad: “Mash'al” va “Nasaf” futbol akademiyalari singari tizimli ish olib borib, mahoratli futbolchilarni voyaga etkazishdir.       Elmurod Ermatov, Andijon  
— deya xabar beradi uff.uz nashri.