Mavzuni davom ettiramiz ... O'zbekiston milliy terma jamoasining guruhdagi raqiblari lageridan nimaiki topsak uni siz bilan birga baham ko'ramiz.
Bugun Qatar matbuotini kuzatdik. U erda ham mart oyidagi o'yinlar atrofida to'xtalishlar bo'lmoqda. Asosan, 23 mart kuni Doha shahridagi "Jassim Bin Hamad" stadionida Eronga qarshi o'tadigan o'yin yoritilmoqda. Eron termasini kuchli va kuchsiz tomonlari ochib berilmoqda. Ularga qarshi ochiq futbol namoyish etmasdan, qarshi-hujum taktikasini o'ynash ko'zda tutilgan.
Oradan 5 kun o'tib Toshkentda bo'ladigan uchrashuv ham tilga olingan.
Ma'lum bo'lishicha, Qatar futbol federatsiyasi mamlakat bosh jamoasi futbolchilariga Eron hamda O'zbekiston terma jamoalarini mag'lubiyatga uchratish vazifasini qo'ygan. Bundan tashqari, mazkur ikki raqibni engish uchun qatarliklarga pul mukofoti ham va'da berilgan. Ayrim manbalarda ushbu miqdor ancha katta ekanligi ta'kidlanmoqda.
Bu taxmin qilish qiyin emasdi. Zero, Qatarda futbolga sarflanadigan mablag' etarli ekanligiga shubhamiz yo'q. Gap ularning darhaqiqat vazifani bajara olishlari yoki olmasliklarida ketmoqda. Nima bo'lgandayam, O'zbekiston termasi o'z o'yinini ko'rsatishi va keraklicha tayyorgarlik amaliyotiga ega bo'lishi lozim.
Balki, bu o'yinlar biz uchun yaqin 2 yilning eng muhim bahslari sifatida esda qolar...
Biz juda istar edik, 2018 yilda FIFA tomonidan JCh-2018 ishtirokchilari haqida maxsus ko'rsatuvlar tayyorlanganda O'zbekiston ham tilga olinsa va mana shu mart oyidagi o'yinlar burilish nuqtasi sifatida yodga olinsa... Bizning ko'chada ham bayram bo'lishi kerak, axir!
— deya xabar beradi uff.uz nashri.