Yaponiyaning Sapporo shahrida VIII qishki Osiyo o'yinlari qizg'in davom etmoqda. Musobaqada jami 32 ta mamlakatdan tashrif buyurgan 1200 nafar sportchilar ishtirok etishyapti. E'tiborli jihati Osiyoning 30 ta mamlakati qatorida bu safar Okeaniya mintaqasi vakillari – Avstraliya va Yangi Zelandiya terma jamoalari ham musobaqada mehmon sifatida qatnashishmoqda. Faqat ushbu mintaqa vakillari medallar uchun kurash olib borishmaydi.
Bu safargi qishki Osiyo o'yinlarida O'zbekiston sharafini figurali uchish bo'yicha terma jamoamiz a'zosi Misha Ge himoya qilishi xaqida xabar berib o'tgandik. Hamyurtimiz o'z ishtirokini bugun - 24 fevralda boshlaydi. Bugun qisqa dastur bo'yicha musobaqalar Toshkent vaqti bilan soat 14:05da start oladi. Misha Ge esa bugungi dastur bo'yicha bizning vaqt bilan soat 16:27da muzga chiqishi kutilmoqda.  
Bugun jami 21 nafar sportchi qisqa dasturda o'z omadini sinab ko'radi. Hamyurtimizdan tashqari erkaklar o'rtasida yakkalikdagi qisqa dasturda bugun shuningdek, Gonkong, Xindiston, Indoneziya, Filippin, Qozog'iston, Malayziya, Xitoy Taypeyi, Janubiy Koreya, Xitoy, Yaponiya va Avstraliya kabi mamlakat vakillari ham ishtirok etishadi.  
Shuningdek, 26 fevral, qishki Osiyo o'yinlarining so'nggi  kuni Toshkent vaqti bilan soat 08:00da musobaqada erkin dastur bo'yicha bellashuvlar o'tkazilib, Misha Ge ushbu bahslarda ham qatnashishi rejalashtirilgan.
Eslatib o'tamiz Misha Ge 15-19 fevral kunlari Seulda bo'lib o'tgan “To'rt qit'a chempionati” Xalqaro turnirida ishtirok etdi va 20 fevral kuni kechqurun Sapporoga etib bordi. Koreyadagi musobaqada Osiyo, Amerika, Afrika va Avstraliyaning eng kuchli figurali uchish ustalari g'oliblik uchun kurash olib borishdi va mazkur turnir Misha Ge uchun VIII qishki Osiyo o'yinlariga tayyorgarlik bosqichi vazifasini o'tab berdi.
Ma'lumot uchun, Misha Ge – Xalqaro toifadagi sport ustasi, 2009 yildan figurali uchish bo'yicha O'zbekiston terma jamoasi a'zosi. U O'zbekiston terma jamoasi sharafini 2011 yilda Astana/Almati shaharlarida bo'lib o'tgan VII qishki Osiyo o'yinlari, hamda 2014 yili Sochi mezbonlik qilgan XXII qishki Olimpiya o'yinlarida himoya qilgan.
Misha Ge qit'a va Xalqaro musobaqalar sovrindori hisoblanadi. Figurali uchish bo'yicha 2015 yili Xitoyning Shanxay shahrida bo'lib o'tgan jahon chempionatida 6-o'rinni egallagan. 2016 yilda Kanadaning Monreal shahrida tashkil etilgan “Autumn Classic International Skate Canada” turnirida 2-o'ringa sazovor bo'lgan.
M.Gening Xalqaro musobaqalarda qayd etgan natijalari:
2009 – Xalqaro turnir. Kaliforniya (AQSh)                   - 1 o'rin.
2010 – Xalqaro turnir. Kaliforniya (AQSh)                   - 1 o'rin.
2011- Qishki Osiyo o'yinlari, Astana (Qozog'iston)          - 6 o'rin
2012 - Aziya Open Trofi, Xitoy.                                        - 2 o'rin
2013 – Xalqaro turnir, Sofiya (Bolgariya)                        - 1 o'rin
2014 – Qishki Olimpiya o'yinlari,  Sochi  (Rossiya)          - 17 o'rin
2015 – Jahon chempionati, Shanxay (Xitoy )                    - 6 o'rin
2015 – Xalqaro turnir, Sofiya ( Bolgariya)                       - 1 o'rin
2016 – Xalqaro turnir, Monreal (Kanada)                      - 2 o'rin
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.