«Milan» klubi va Italiya terma jamoasining sobiq yarim himoyachisi Jennaro Gattuzo hech qachon maydondagi kurashlardan qochmagan. Nafaqat raqib, balki o'zini ham ayamagan.
U ayni paytda murabbiylik sohasida faoliyat yuritmoqda. Aytish joizki, bu borada Gattuzoning unchalik omadi chopmayapti. Shu kungacha u Shveytsariyaning «Son», Italiyaning «Palermo» va Gretsiyaning OFI klublarida ishlashga ulgurdi. Yunon o'lkasini o'tgan yilning dekabrida tark etgandi. Keyinchalik Italiya quyi divizioni vakili «Piza» bilan shartnoma imzoladi.
Jennaro yaqinda FIFA rasmiy saytiga intervyu berdi. Quyida ana shu suhbat bilan tanishishingiz mumkin.
- Jennaro, Pizadagi hayot qanday kechmoqda?
- Yomon emas. Shahar ajoyib. Xalqi ham futbolga oshno tutingan.
- Jamoangiz joriy mavsumda mag'lubiyatga uchramadi va ligada uchinchi o'rinni egallab turibdi. Hozirgi holatdan qoniqish hosil qilyapsizmi?
- Tayyorgarlikni kech boshladik. Birga ishlayotganimizga ko'p bo'lmadi. Ammo ishimizni oxirigacha etkazmoqchimiz. Safimizdagi o'n nafar futbolchi transfer bozori yopilishi arafasida kelgan. Ayrim o'yinchilar esa asosiy tarkib futbolchilari sanalishmagan. Shu jihatlarni inobatga olsak, bugungi holatimizdan qoniqish hosil qilsak bo'ladi.
- «Piza» o'tgan asrning 80-90-yillarida «A» seriyaning doimiy ishtirokchilaridan hisoblangan. Ammo moliyaviy muammolardan so'ng jamoa quyi ligalarga tushib ketdi. Sizningcha, klub o'sha cho'qqilarga yana chiqa oladimi?
- O'ylashimcha, buning uchun imkoniyatlarimiz etarli. So'nggi yillarda katta mablag' sarflandi. Ammo yaxshi futbol namoyish qilish uchun pulning o'zi kamlik qiladi. Masalan, buning uchun tajribali mutaxassislar, pullarni aql bilan sarflay oladigan shaxslar lozim. Klub rahbari Fabritsio Lukkezi shunday insonlardan biri. Jamoaning asosiy maqsadi - asta-sekinlik bilan o'sish va kerakli natijani qo'lga kiritish.
- O'z vaqtida siz tajovuzkor futbolchi bo'lgansiz. Murabbiy sifatida ham shunday xislatlarga egamisiz? Futbolchilar bilan ishlash usulingiz haqida gapirib bersangiz...
- Birinchi navbatda, talabchanman. Qo'pol futbolchi bo'lganimni nazarda tutyapsizmi? Murabbiy sifatida bu odatlardan voz kechganman. So'nggi yillarda futbolchilarga nisbatan munosabatim o'zgardi. Avvaliga qattiqqo'l bo'lishga urinardim.
- Siz buyuk murabbiylar qo'l ostida o'ynagansiz. Ulardan nimalarnidir o'zlashtirganmisiz?
- Biror narsani o'rganganman, deya olmayman. Chunki o'z uslubimga egaman. Buni esa shogirdlarimga uqtirishim talab etiladi. Futbolchi sifatida omadim chopgan va katta klublarda o'ynaganman. O'sha jamoalarga o'tganda, nima qilish kerakligi va o'zimni qanday tutishim lozimligini bilardim. Endi murabbiy sifatida yosh futbolchilar bilan ishlayapman. Ularga birinchi navbatda, professionalizmning muhimligini o'z uslubim orqali etkazmoqdaman.
Davomi InterFUTBOL gazetasi blogida.
— deya xabar beradi uff.uz nashri.