Qisqa muddatli ta'tildan so'ng, jamoamiz futbolchilari yana mashg'ulotlarni davom ettira boshlashdi. Bugun jamoamiz a'zolari Toshkent viloyati Ahmad Yassaviy mahalla hududida joylashgan stadionda mashg'ulot o'tkazishdi. Kechki payt esa jamoa rahbariyati bilan uchrashuv bo'lib o'tdi. Yangi mavsum arafasida tashkillashtirilgan bu uchrashuvga jamoamiz bosh homiysi Olmaliq Kon-metallurgiya kombinati moliya va iqtisod bo'yicha direktori O'ktam Dehqonboevich Karimov tashrif buyurdi. Bir soatga yaqin davom etgan yig'ilishda jamoa rahbariyatiga 2017 yilda "Olmaliq" sharafini himoya etuvchi futbolchilar va murabbiylar shtabi bosh direktor Ibrohim Yuldashev tomonidan tanishtirildi. Shundan so'ng, O'ktam Dehqonboevich jamoaga omad tiladi. Suhbat davomida jamoa oldida yuqori maqsadlar qo'yilganligi ta'kidlandi. 2016 yil yakunida jamoada amalga oshirilgan o'zgarishlar shunchaki emasligi, yaqin yillarda Olmaliqda mamlakat futboli rivojiga o'z hissasini qo'shadigan raqobatbardosh jamoa bo'lishi haqida so'z bordi. O'ktam Karimov suhbat davomida jamoa kelajagiga doir quyidagilarni aytib o'tdi. "Olmaliq shahrida xalqaro talablarga javob beradigan jamoa turargohi va o'quv-mashg'ulot majmuasini barpo etish yo'lida izlanishlar olib borilmoqda va bu reja bosqichma-bochqich amalga oshiriladi. Bu yildan ishqibozlar uchun maxsus elektron abonementlar chiqarildi. Stadion hududida klub atributikalari sotuvini tashkil qiluvchi do'kon ochiladi. Bu do'konda "Olmaliq" jamoasiga aloqador mahsulot bilan bir qatorda, O'zbekiston chempionatida ishtirok etadigan boshqa jamoalar bilan kelishgan holda ularning atributikalari ham sotuvi tashkil etiladi. Shuningdek, jamoa uchrashuvlarini Olmaliq TV orqali ko'rsatish ham rejalashtirilmoqda. Bu ishlarning barchasi Olmaliqda futbolni rivojlantirish, ko'p ming sonli ishqibozlarga qulayliklar yaratish uchun amalga oshirilmoqda. Tashkiliy ishlar bilan bir qatorda futbolchilarning mazmunli va shiddatli o'yin namoyish etishi ham muhimdir. Siz qanchalik yaxshi o'yin namoyish etsangiz jamoa muxlislari shunchalik ko'payadi. O'ylaymanki, Viktor Balyutovich jamlagan bu tarkib jamoa ishqibozlari va rahbariyat ishonchini qozonadi." Uchrashuv davomida jamoa bosh murabbiyi Viktor Balyutovich Kumikov ham so'z olib, jamoa uchun mavsumoldi tayyorgarlik bosqichi yaxshi o'tganligini, buyog'iga jamlangan futbolchilar bilan yuqori maqsad sari odimlashga tayyor ekanligini bildirdi. Futbolchilar nomidan so'z olgan jamoa sardori Islom Inomov ham rahbariyat tomonidan yaratib berilgan sharoit uchun minnatdorchilik bildirdi. Jamoa futbolchilari oldilariga qo'yilgan vazifani bajarish yo'lida bor imkoniyatlarini ishga solishlarini ta'kidladi. Yaqin kunlarda jamoa tarkibini OAV va ishqibozlarga tanishtiruv marosimi ham tashkil etish rejalashtirilmoqda. Bu haqda keyinroq ma'lumot berib o'tamiz.  
— deya xabar beradi uff.uz nashri.