“Erudit Sport” nashri quyida tomoshabop o'tishi kutilayotgan besh to'qnashuvni tomosha qilishni tavsiya etadi:
“Vilyarreal” – “Real” Madrid
174 million evro VS 766,80 million evro
O'yin haqida ikki og'iz:
La liganing “eng durrangchi” jamoasi “Vilyarreal” chempionat etakchilarini oyog'idan chalishga, ulardan ochko tortib olishga usta. Primeraning kuchli beshligini to'ldirib turgan etakchilar murabbiy Fran Eskriba boshqaruvidagi “Sariq suvosti kemasi”ga qarshi ko'pi bilan durang o'ynagan. G'alaba haqida gap-so'z bo'lishi mumkin emas. Bundan tashqari, ispan mutaxassisi qo'l ostidagi klub eng yaxshi himoyaga ega (bor-yo'g'i 15 to'p olib chiqqan).
Boshqacha aytganda, Zidan boshchiligidagi “Real”ni jiddiy uchrashuv kutmoqda. To'g'ri, madridliklarga raqib darvozasiga zarba yo'llashda teng keladigan yo'q (o'rtacha 17,6 zarba). Lekin mehmonlarning ham ojiz nuqtalari bor: asosiy ochkolarni raqib maydonida yo'qotadi. “Chaqilmas yong'oqqa” aylangan “Vilyarreal” esa bunday imkonni yo'qqa chiqarmaslik tarafdori. Xullas, qarama-qarshilik ishtirokchilari maydonga “engini shimarib” tushadi. Tabiiyki, o'yin ham tomoshabop o'tadi.
“Inter” – “Roma” (26 fevral, yakshanba, soat: 00:45)
O'zaro uchrashuvlar:
72 G'ALABA 48 DURANG 49 G'ALABA
So'nggi uchrashuv: “Inter” – “Roma” 1:1 va 1:2
Imkoniyat: 30/40/30
Jamoalarning transfer qiymati:
“Inter” – “Roma”
316,50 million evro VS 289 million evro
O'yin haqida ikki og'iz:
To'qnashuv ishtirokchilari bir vaqtning o'zida ham qochayotgan, ham quvayotgan jamoalar hisoblanadi. Ya'ni tomonlarning ochko yo'qotishiga haqqi yo'q: na turnir jadvalidagi etakchilikni “Yuventus”ga topshirib qo'ygan “Roma”ning, na sekin-asta o'z o'yinini topib borayotgan “Inter”ning. Ustiga-ustak, ochkolar tavofutini kamayishi mavsum yakunida qo'l keladi. Murabbiy Stefani Pioli “Neradzurrilar”ni “odam qilyapti”, desak mubolag'a bo'lmaydi. Keyingi o'n raqibining sakkiztasi mezbonlarning “sovuniga kir yuvgani” so'zimizni tasdiqlaydi. O'z navbatida, “Bo'rilar” ham og'zidagi o'ljasini raqibiga qo'sh-qo'llab topshirmaydi. Shunga qaramay, dastlabki davradagidek ovi baroridan kelib, g'alabani osonlikcha qo'lga kiritmaydi. Uch ochko uchun maydonning har bir qarichida kurash kechadi. Qisqacha aytganda, yuqori harorat ostida o'tuvchi uchrashuvni o'tkazib yubormagan ma'qul.
“Manchester Yunayted” – “Sautgempton” (26 fevral, yakshanba, soat: 21:30)
O'zaro uchrashuvlar:
2 G'ALABA 2 DURANG 1 G'ALABA
So'nggi uchrashuv: “Manchester Yunayted” – “Sautgempton” 1:1 va 3:2
Imkoniyat: 40/30/30
Jamoalarning transfer qiymati:
“Manchester Yunayted” – “Sautgempton”
497 million evro VS 215 million evro
O'yin haqida ikki og'iz:
“Manchester Yunayted” Premer liga bahslarida oktyabr oxiridan, aniqroq aytganda, o'n olti matchdan beri yutqazmaydi. O'zi ishtirok etayotgan yana uch musobaqada yurishini davom ettiryapti. Ularning birida, Liga kubogida finalga chiqdi. Ha, ikkinchi finalchi “Sautgempton”ga oson bo'lmaydi. Bu Mourino yulduzli tarkibga egaligidan emas, aksincha bog'i “hosilga kirib, meva berayotganidan”. Klublar shu kungacha musobaqa doirasida besh bora to'qnashgan. O'sha bellashuvlarning ikkitasida “Yunayted” navbatdagi bosqichga chiqqan, “Soton” bittasida ishtirokini davomlagan. Ammo ayni damdagi “Sautgempton” ham anoyilardan emasligi allaqachon o'z tasdig'ini topgan (so'nggi uch o'yinda ikki g'alabaga erishdi). Ustiga-ustak, turnir jadvalining “ekvatori”ga joylashib olgan klub bor kuchini Liga kubogi finaliga tashlashi mumkin. Payqaganingizdek, finalning kurashlarga boy o'tishiga etarlicha sabablar topiladi.
“Atletiko” Madrid – “Barselona” (26 fevral, yakshanba, soat: 20:15)
O'zaro uchrashuvlar:
50 G'ALABA 38 DURANG 71 G'ALABA
So'nggi uchrashuv: “Atletiko” Madrid – “Barselona” 1:2 va 1:1
Imkoniyat: 30/40/30
Jamoalarning transfer qiymati:
“Atletiko” Madrid – “Barselona”
497,50 million evro VS 753,50 million evro
O'yin haqida ikki og'iz:
Yaqinda Qirollik kubogida yo'llari kesishgan jamoalar endilikda Primera bahsida munosabatlarga oydinlik kiritadi. “Matraschilar” ustozi Diego Simeone “Barselona” bilan ko'p va xo'b uchrashsada, kam hollarda g'alabani tantana qiladi. Shunisi qiziqki, “Atletiko” katalon klubini faqat Chempionlar ligasida dog'da qoldirgan. Ispaniya chempionati va kubok bundan mustasno. Ushbu turnirlarda yo mag'lubiyat ko'chasiga kiradi, yo durangdan boshi chiqmaydi.
Shu sababli, maydon egalari “Barsa” sindromi”ni yo'qqa chiqarish yo'lida harakatlanadilar. Turgan gapki, Chempionlar ligasida “PSJ” tomonidan tor-mor etilgan Luis Enrike shogirdlari ham “esi borida etagini yopishni” rejalartirgan. Sababi “Barsa” qator ko'rsatkichlarda La liganing oldi jamoasi: eng yaxshi hujum chizig'i (61 gol), to'p nazorati (61,9 foiz zarba), uzatmalarning aniqligida (86,5 foiz). Xo'sh, “Atletiko” davrani “Barsa”dan tortib oladimi yoki yana ochko ulashadi? Bu savolga yakshanba oqshomida javob topamiz.
Ulug'bek RAHMONQULOV
— deya xabar beradi uff.uz nashri.