Osiyo Chempionlar Ligasi–2017 turniri “A” guruhi 2-turidan o'rin olgan “Lokomotiv” – “Al-Ahli” uchrashuvi oldidan tashkil etilgan matbuot anjumanida dastlab amirliklar ustozi Kosmin Olariu va hujumchi Diop ishtirok etdi.
“Ertaga o'yin biz uchun qiyin kechishi tabiiy. Bo'lajak o'yin ham ikki jamoa uchun muhim sanaladi. “Lokomotiv” 1-turda mag'lubiyatga uchraganiga qaramay, ular kuchli jamoa. “Loko” muxlislar qarshisida yaxshi o'ynaydi, jamoa kuchli futbolchlarga ega. OChL biz uchun muhim musobaqa va unda yaxshi o'yin orqali g'alaba qozonishga harakat qilamiz. Avvalgi mavsumlarda “Nasaf” bilan o'yilar qiyin kechgan, ammo to'plangan tajriba “Lokomotiv”ga qarshi qo'l keladi.  Ikki yil avval “Al-Ahli” finalga chiqqan, ammo o'shanda bu vazifa sifatida qo'yilmagan. O'sha mavsumda guruhdan chiqqanimiz ham katta natija bo'lgandi”, – dedi Kosmin Olariu.
“Safar o'yini qiyin kechishi tayin. Murabbiy aytgan ko'rsatmalarni bajaramiz. “Lokomotiv” kuchli jamoa, shunga qaramay g'alaba qozonish uchun maydonga tushamiz. “Lokomotiv” tarkibida kuchli futbolchilar ko'p, aynan kim kuchli ekanini ayta olmayman. Ular jamoaviy o'yin namoyish qilishadi”, – dedi Diop.
Eslatib o'tamiz, “Lokomotiv” va “Al-Ahli” uchrashuvi ertaga, TTZ mavzesida joylashgan “Lokomotiv” stadionida bo'lib o'tadi. O'yin 16:00 da start olishi rejalashtirilgan.
— deya xabar beradi uff.uz nashri.