Butunjahon boks seriyasining ettinchi mavsumida “O'zbek yo'lbarslari” jamoasi ikki turda ham mag'lubiyatga uchradi. Dastlab “China Dragons” (3:2), so'ngra  “Astana Arlans” (4:1) g'alaba qozondi. Birinchi turdagi kutilmagan mag'lubiyatdan keyin ikkinchi turda uch ochkoga ega bo'lish muhim edi. Shu sababli, murabbiylar birinchi turda ringga ko'tarilmagan Olimpiada sovrindorlariga ishonch bildirdi.
Jamoamiz murabbiyi To'lqin Qilichev ham buni tasdiqladi. “Biz eng zo'r bokschilarimiz bilan kelganmiz. Ammo jang natijalarini oldindan aytish qiyin”, dedi u “Astana Arlans”ga qarshi bahs oldidan. Yakunda murabbiy fikrining biz keltirgan ikkinchi qismi o'z tasdig'ini topdi, xolos: “Jang natijalarini oldindan aytish qiyin”. Tarkibda to'rt nafar Rio olimpiadasi ishtirokchilari ringga chiqqaniga qaramay (Murodjon Ahmadaliev (49:46, 50:45, 49:46), Bahodir Jalolov (50:45, 49:46, 48:47), Shahram G'iyosov (47:48, 48:47, 48:47) ularning faqat bir nafari (Bektemir Meliqo'ziev (46:49, 46:49, 46:49) g'alaba qozondi. Demak, ikki turdan keyin jamoamiz birorta ochko jamg'armagan holda guruhda so'nggi pog'onada bormoqda. Xo'sh, To'lqin Qilichevning ta'biri bilan aytganda, “eng zo'r bokschilarning mag'lubiyatga uchrashiga” nima sabab bo'ldi? Ishonamanki, Said Ahmad qalamiga mansub “Sobiq” hajviyasini o'qigansiz. Qahramon muvaffaqiyatidan keyin dastlab gazetalarda ko'rinish beradi, so'ngra u haqda kino olinadi. Keyin turli soha vakillari bilan uchrashuvlarga taklif qilinadi, xullas, ish qolib ketadi. Mashinasi chang bosadi hatto. Nazarimda, gap nima haqida ketayotganini payqadingiz. Tan olaylik, ular uchun uchrashuvlar ko'payib ketdi. Yarim yil ichida ringdan ko'ra ko'proq tadbirlarda ishtirok etgandir, ehtimol.
Shu o'rinda yana bir voqeani eslamoqchiman. Rio-2016 oldidan O'zbekiston boks terma jamoasi bosh murabbiyi Marat Qurbonov bilan musobaqaga tayyorgarlik borasida muloqotda bo'lgandim. O'shanda bosh murabbiyga shogirdlaridan blits-intervyu olish niyatim borligini aytganimda, Marat aka buning sira iloji yo'qligi, terma jamoa yopiq tarzda tayyorgarlik ko'rayotganini ma'lum qilgandi. Jamoamiz ustozi boshqa nashrga ham shu ma'noda intervyu bergandi: “Bokschilarimiz ommaviy axborot vositalarida ketma-ket chiqishlar qilib, “teleyulduz” bo'la boshlaganidan so'ng shunday holatlar kuzatilgandi” (Marat Qurbonov sportchilarning jarohatga yo'liqqaniga ishora qilgan, muallif izohi). Rio-2016 dan avval terma jamoa eshiklari OAV uchun yopiq edi. Olimpiadadagi muvaffaqiyatda ushbu qaror ham muhim rol o'ynagan. Buni o'sha kezlarda kimdir inkor etishi mumkin edi. Bugun esa iqror bo'lishga majbur. “O'zbek yo'lbarslari”ning ikkinchi mag'lubiyatidan keyin sport yangiliklarini yoritishga ixtisoslashgan internet nashrlardagi muxlislar ham mag'lubiyatga asosiy sabab sifatida ushbu jihatni ko'rsatgan. Foydalanuvchilardan biri “Jamoamiz Olimpiadadan keyin o'zini ancha erkin his qila boshladi”, degan bo'lsa, tarmoqning boshqa bir a'zosi kuyunchaklik bilan “Terma jamoa murabbiylari bokschilarni ijtimoiy tarmoqlardagi “o'ta faolligini” tartibga olmasa, oldimizda turgan Osiyo va Jahon chempionati, shuningdek, Osiyo o'yinlari barbod bo'ladi”, deb  fikr qoldirgan. Yana bir foydalanuvchining munosabati quyidagicha bo'lgan:  “Kontsentratsiya yo'qolgan. Ularni ijtimoiy tarmoqlardan uzoqlashtirib, tinchgina mashg'ulot o'tkazishga qo'yish kerak”. Haqiqatda, Olimpiadada sovrindorlar qatoridan o'rin olgan bokschilar teleekranda tez-tez ko'rinadigan odat chiqardi, o'zini shou-biznesda sinab ko'rdi, ijtimoiy tarmoqlarning faoli foydalanuvchisiga aylandi. Bularning bari Hojiboy Tojiboevning “televizorni o'chirsa ham Zidan kalla qo'yyapti” degan hazilini yodga soladi. Foydalanuvchilar ushbu holatga urg'u beryapti va ular haqlar. Ishqibozlarning fikrlari tanqidiy ruhga qorishgan bo'lsada, ular “oltin avlod”ni yo'qotishni istamaydilar. Futbolda JCh yoki OChda porlagan o'yinchilar keyinchalik nom-nishonsiz yo'qolib ketganini ham unutmagan fanatlar. Sutdan og'zi kuygan qatiqni ham puflab ichadi, axir.
Sportda chempion bo'lishdan uni himoya qilish qiyin. Chunki sovrindorlar qatoriga kirgan sportchidan faqat va faqat yuksak natija kutila boshlanadi. Qisqacha aytganda, uning mag'lubiyatga uchrashiga haqqi bo'lmaydi. Yarim yil ichida g'oliblar safini tark etsa, hazm qila olmaydilar. Ha, qabul qilinmaydi. Chunki u muxlislarning tasavvurida chempion sifatida shakllangan, boshqa natija qoniqtirmaydi. Umid qilamanki, keyingi bahslarda ishqibozlar kutgan natijalar qayd etiladi. Ayniqsa, mayning boshida Toshkent shahrida o'tkaziluvchi 29-Osiyo, avgustning so'ngida Gamburg shahrida tashkil etiluvchi 19-Jahon Chempionatida etakchilar qatoriga kiradi. Bundan tashqari, Butunjahon boks seriyasining “S” guruhida ham. Bir yil ilgarigi musobaqada “O'zbek yo'lbarslari” guruhdagi 30 jangning 22 tasida g'alaba qozongandi. Joriy mavsumdagi natijalar esa 10 uchrashuvning 3 tasida jamoa hisobiga g'alaba, 7 tasida mag'lubiyat yozilgan. Bundan chiqdi, bokschilarimizning “mag'lubiyatga uchrash” “limiti” allaqachon yakuniga etdi. Buni o'zini ovutishga yo'ymasligingizni so'rayman. Ikki tur natijasiga ko'ra qandaydir fikrga kelish mumkindir, ammo yakuniy xulosa chiqarishga hali vaqt bor. Ishonchim komilki, bokschilar bor e'tiborini boksga qaratib, olti turdan keyingi xulosalarni ijobiy bo'lishini ta'minlaydi.
Ulug'bek RAHMONQULOV, «Erudit Sport» gazetasi
— deya xabar beradi uff.uz nashri.