Toshkentda dzyudo bo'yicha ayollar va erkaklar o'rtasida O'zbekiston chempionati bahslari start oldi. Kecha musobaqada ishtirok etuvchi sportchilar O'zbekiston dzyudo federatsiyasida ro'yxatdan o'tishdi va vazn o'lchash marosimida qatnashishdi.
Bugundan esa bellashuvlar rasman boshlanadi. Musobaqaning birinchi kunida -63 kg, -70kg, -78kg, +78 kg, -81kg, -90kg, -100kg, +100kg vazndagi polvonlar tatamiga chiqishadi. Bugun soat 16:00ga qadar vazn toifalar bo'yicha saralash bahslari o'tkazilsa, 17:00dan boshlab final janglari bo'lib o'tadi va g'olib hamda sovrindorlar nomi ma'lum bo'ladi. Bugun shuningdek, O'zbekiston chempionatining tantanali ochilish marosimi ham tashkil etiladi.
Ertaga, 2 mart sanasida esa -48kg, -52kg, -57kg, -60kg, -66kg, -73kg vazn toifasida musobaqalar bo'lib o'tadi. Ta'kidlash kerakki bu safargi mamlakat chempionati bellashuvlarida O'zbekistonning eng kuchli dzyudochilari ishtirok etishmoqda. Bu esa musobaqaga bo'lgan qiziqishni yanada oshirishi shubhasiz. Zero, O'zbekiston chempionatida zafar quchadigan sportchilar ushbu mavsumda xalqaro maydonda yurtimiz sharafini himoya qilish imkoniga ega bo'lishadi. Eslatib o'tamiz, musobaqaga “O'zbekiston” sport majmuasi mezbonlik qiladi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.