Ronaldu “As” va “Sky Sports” jurnalisti Gilem Balage “Real” hujumchisi Krishtianu Ronaldu hayoti haqida kitob yozmoqda. Shu haftada ana shu kitobdan ba'zi parchalar xorij ommaviy axborot vositalarida e'lon qilindi. Quyida e'tiboringizga ana o'sha parchalarning tarjimasini havola etamiz. “Otam bilan munosabatlarim yomon edi”
“Mening otam piyonista edi. Men uni bu ahvolda ko'rib, juda xafa bo'lardim. Otam ichkilik balosidan qutilishini, hamma otalarga o'xshab men bilan o'ynashini, meni erkalashini istardim. Albatta, ko'p ichkilik ichishiga qaramay, otamni yaxshi ko'rardim. Ammo hech qachon u bilan oramizda samimiy, ochiq-oydin suhbat bo'lmagan. Hech qachon. Balki butun hayotim davomida faqat bir marta bo'lgandir... Otam 2005 yil olamdan o'tdi. U Londondagi kasalxonada og'ir ahvolda yotgandi. Men o'shanda bosh murabbiyimiz ser Aleks Fergyusonga: “Otamning holidan xabar olish uchun uning oldiga ketmoqchiman”, - dedim. O'sha payt mavsumning eng muhim pallasi edi. Shunga qaramay Fergyuson ketishimga ruxsat bergan. “Otangning oldida futbol hech qanday qiymatga ega emas. Bemalol uning oldiga borib, ko'rib kelaver”, - deb aytgan. Ser Aleksning bu ishini hamisha qadrlayman.
“O'g'lim iPhone 6 so'ragan edi, unga rad javobini berdim”
“Har doim o'g'lim bo'lishini orzu qilardim. 25 yoshlik paytimda yosh ota bo'lishni juda ham istagandim. Bu istagim amalga oshdi. O'g'limni onasisiz, bir o'zim katta qilayotganimga kelsak, buning hech qanday muammoli tarafini ko'rmayapman. Ko'pchilik bolalarning onasi ham, otasi ham yo'q. Shu sababli o'g'lim otasi bilan yashayotgani etarli deb hisoblayman. Men hech qachon o'g'limning onasi haqida hech kimga hech narsa aytmaganman. Bundan keyin ham aytmayman. O'g'lim katta bo'lganida, uning o'ziga hammasini tushuntirib beraman. Yotig'i bilan. Umid qilamanki, o'g'lim meni to'g'ri tushunadi. O'g'limning dunyoga kelishi hayotimni qattiq o'zgartirib yubordi. O'g'limning kulayotganini ko'rsam, bu menga kuchli ruhiy quvvat beradi. O'g'lim ham mening yo'limdan borib, hujumchi bo'lishini, ko'plab gollar kiritishini istardim. Ammo unga ko'proq darvozada turish yoqadi. Albatta, o'g'limning tarbiyasiga katta ahamiyat qarataman. Katta, yumshoq to'shaklarda uxlasa, har kuni nonushtaga yogurt va mevalarni tanovul qilsa, otasining garajida qimmatbaho mashinalar tursa, taltayib ketishi hech gap emas. Yaqinda o'g'lim mendan iPhone 6 olib berishimni so'radi. Men unga rad javobini berdim. Keyin esa telefonni nima qilishini so'radim. “Sizga qo'ng'iroq qilib turish uchun, dada”, - dedi o'g'lim. Men esa buning uchun buvisining telefonidan foydalanishi mumkinligini aytib o'tdim. Albatta, o'g'limni tunu kun nazorat ostida ushlab tura olmayman. Ammo etarlicha ta'lim va to'g'ri tarbiya berish – otaning o'g'liga hadya qilishi mumkin bo'lgan eng yaxshi sovg'a deb hisoblayman.
“Messi bilan raqobat borasida ortiqcha tashvishga tushmayman”
“Men Messi bilan raqobatlashish borasida ortiqcha tashvish chekmayman. So'nggi 8 yil davomida o'zimning eng yuqori darajamni namoyish qilib kelmoqdaman. Yana shunday birorta futbolchini menga ko'rsata olasizmi? Dunyoning eng yaxshi futbolchisi bilan ikkinchi o'rinda o'yinchi o'rtasidagi farq – mayda detallarda. Masalan, qo'lga kiritadigan sovrinlaringga ham ko'p narsa bog'liq. Balki siz Messini eng zo'r deb hisoblarsiz. Yana kimdir Inestani birinchi o'ringa qo'yadi. Men esa o'zimni eng zo'r futbolchi deb bilaman. Umuman olganda, unchalik kamtar inson emasman. Buni tan olaman. Ammo futbolchi sifatida o'sib borish uchun o'rganishdan hech qachon bo'yin tovlamayman. Bu borada boshqalarning fikrini eshitishga, ulardan nimadir o'rganishga intilaman. Menga boshqa sport turlarini tomosha qilish, boshqa sportchilarning harakatlaridan o'zim uchun foydali biror jihatni o'rganish yoqadi”.
— deya xabar beradi uff.uz nashri.