O'zbekistonning amaldagi chempioni – Toshkentning “Lokomotiv” klubi kecha Oliy liga-2017 doirasidagi ilk uchrashuvini o'tkazdi. “Temiryo'lchilar” ilk turda Muborakning “Mash'al” jamoasini safarda mag'lub etib, yangi mavsumni muvaffaqiyatli tarzda boshlashdi. Yangi mavsum oldidan “Loko” safiga kelib qo'shilgan ivuarlik himoyachi Muhammad Kone klub matbuot xizmatiga “Mash'al”ga qarshi bahs hamda OChL doirasida o'tgan “Al Ahli” bilan o'yin to'g'risidagi fikrlari bilan o'rtoqlashdi. – Chempionlar Ligasi doirasidagi ilk uy uchrashuvimizda g'alaba qozonmasak bo'lmasdi. Zero ilk turda kutilmaganda Saudiya jamoasiga imkoniyatni boy berib qo'ydik. Natijada “Al Ahli”ga qarshi bahsda o'z ishqibozlarimizni hafa qila olmasdik. Shukr, ushbu vazifani uddalay oldik va jamoamiz xarakter namoyish etgan holda Dubay klubini mag'lub etdi. Ushbu o'yindagi g'alaba bizga Oliy liga doirasida o'tgan “Mash'al”ga qarshi o'yinda ham kuch berdi, deya olaman. Zero biz Muborakka amaldagi chempion sifatida tashrif buyurdik va anchagina yaxshi shakllangan jamoani mag'lubiyatga uchratishning uddasidan chiqdik. “Mash'al” ancha tartibli o'yin namoyish etdi. Biroq biz ushbu uchrashuvda faqat va faqat 3 ochkoni ko'zlagan holda maydonga chiqqan edik. Binobarin mamlakat chempioni va kubogi sohibi ekanmiz, boshqa jamoalarni xurmat qilgan holda o'ynashimiz lozim. Qolaversa, o'z muxlislarimizni har bir o'yinda xushnud etishga urnishimiz kerak bo'ladi. Ular bizni mavsumdagi ilk uy uchrashuvimizda ajoyib tarzda qo'llab-quvvatlashdi. Umid qilamanki, muxlislarimiz keyingi  bellashuvlarda ham stadionga kelib jamoamizga shijoat berib turishadi, – deydi mahoratli himoyachi.
— deya xabar beradi uff.uz nashri.