O'zbekiston kiberfutbol assotsiatsiyasi o'z nomini Virtual sport o'yinlari va kiberfutbol federatsiyasiga o'zgartirdi. Shu yilning 28 fevral kuni Adliya vazirligida ro'yxatdan o'tgan yangi tashkilot virtual sport o'yinlarini ommalashtirish, musobaqa va chempionatlar tashkil qilish bilan shug'ullanadi. Kibersport bugungi kunda dunyo bo'ylab ommalashib borayotgani hech kimga sir emas. Virtual sport o'yinlari tarixi 1997 yilga borib taqaladi. Aynan o'sha yili birinchi kibersport ligasi – CPL tashkil etilgandi. Dunyodagi birinchi kiberfutbol assotsiatsiyasi nodavlat notijorat tashkiloti O'zbekistonda yaratilgani alohida e'tiborga loyiqdir. Assotsiatsiya o'z faoliyatini kibersport bo'yicha ESWC jahon chempionatida ishtirok etish bilan boshlagandi. Qisqa vaqt mobaynida tashkilot katta muvaffaqiyatlarga erishdi. Assotsiatsiya faoliyatining birinchi oylarida O'zbekiston Futbol Federatsiyasining rasmiy a'zosiga aylandi, hamkorlik borasida O'zPFLning barcha klublari bilan shartnomalar imzoladi. Shu tariqa, O'zbekistonning 20 ga yaqin futbol klublari o'z tarkibiga kiberfutbolchilarni qo'shib oldi. 2016 yilning noyabr oyida O'zbekiston Futbol Federatsiyasi Kiberfutbol assotsiatsiyasining jahondagi birinchi Professional futbol ligasi – PCFL loyihasi yaratilishini ma'qulladi. Tashkilotning eng yorqin natijalaridan biri kibersport musobaqalari uchun O'zbekistonda birinchi professional arena – UZ Arena ochilishi bo'ldi. 
— deya xabar beradi uff.uz nashri.