“Navbahor” 2011 yildan beri ilk turda g'alaba qozonmay kelayotgandi. Ushbu noxush an'anaga bugun chek qo'yildi. Namangandagi bellashuv yana shunisi bilan e'tiborga molik bo'ldiki, ushbu o'yin muxlislar tomonidan Janubiy Koreyaga feysbuk orqali to'g'ridan to'g'ri translyatsiya qilindi. Uni stadionda 12 mingdan oshiq muxlis tomosha qilgan bo'lsa, Koreyada ham mingdan oshiq ishqibozlar bevosita kuzatish imkoniyatiga ega bo'ldilar. Chunki bir vaqtning o'zida bir necha qurilmalardan teleuzatuv amalga oshirildi.   Bevosita o'yin haqida qisqacha ma'lumot beradigan bo'lsak, 15- daqiqada himoyachilar xatosidan so'ng Mirzohid G'ofurov raqib darvozaboni bilan birga-bir vaziyatga chiqib, hisobni ochdi. Ikkinchi bo'limda mezbonlar katta kuch bilan oldinga o'tishdi. Bu safar standart vaziyat “Navbahor”ga foyda keltirdi. Burchak to'pini Oybek Qilichev jarima maydoniga uzatgach barchadan baland sakragan himoyachi G'iyos Komilov o'z nomiga gol yozib qo'ydi - 2:0. Qo'shib berilgan vaqtda Navro'z Hayipov hisobni qisqartirdi.   Shunday aktsiyalardan birining tashkilotchisi, vodiymedia.uzning Janubiy Koreyadagi vakili Abdulaziz Abdullajanov bu haqda shunday deydi: “Butun Koreya bo'ylab 1000 dan oshiq “Navbahor” muxlislari o'yinni bevosita ko'rish imkoniyatiga ega bo'ldilar. Shaxsan o'zim uchrashuvni Seulda 100 ga yaqin ishqibozlar bilan ko'rishga muvaffaq bo'ldim. Bu erda AKT shunday rivojlanganki, telefon orqali amalga oshirilgan translyatsiyani katta monitorga ulab, huddi jahon chempionati o'yinlarini tomosha qilgandek xis etdik o'zimizni. “Navbahor”dan bu yil muxlislarning umidi juda katta. Jamoada yuz bergan o'zgarishlar bundan dalolat berib turibdi. Ayniqsa, Anvar Solievni klubga sport direktori sifatida qaytganidan juda xursand bo'ldik. Bu “Navbahor”ni qayta jonlanayotganidan darak berib turibdi. Vaqtida sevimli jamoamiz o'yinlarini maydonning o'zida 60 mingdan oshiq ishqiboz kuzatgan. Yana shunday davrlar kelishiga ishonamiz. Milliy terma jamoa bosh murabbiyi Samvel Babayanning Namagandagi faoliyati, o'sha paytdagi Farg'ona va Namangan viloyat hokimlarining futboldagi o'zaro bahslari haqida maqolaning davomida - vodiymedia.uzda o'qiysiz.
— deya xabar beradi uff.uz nashri.