«Chelsi» - «Suonsi» uchrashuvini takroran tomosha qilish chog'i, oilamizdagilar tili bilan aytganda, yodlayotganimda, telefon qo'ng'irog'i yangradi. Go'shakni ko'tardim. «InterFutbol»da ma'lum muddat ijod qilgan hamkasbim Gulchehra Murodova. Salom-alikdan so'ng u hazillashdi: - Yana futbol tomoshasimi? - Ha, yodlayapman. - Demak, jurnalist futbol muammolari bilan band. - Aslida shunday, lekin buni sal boshqacharoq ifodalash kerak. Futbol muammolari bilan tom ma'noda shug'ullanadigan mutasaddilar etarli. Bizning kuchimiz so'zga etadi, xolos. - Hozir «Kitob dunyosi» gazetasida Gabriel Garsiya Markesning «Boshqotirma» nomli hikoyasini o'qidim. Kichik hikoya. Shuni sizga ilinmoqchiman. Maqola yozishingizda asqatadi... Xullas, biroz noqulaylik tug'dirsada, hamkasbim hikoyani o'qib berdi. Uning  bosh g'oyasi haqiqatan ham, futbol borasidagi o'ylarimga mos tushdi. Gulchehra bejiz ta'kidlamagan ekan, hikoya qahramoni - olam muammolari xususida bosh qotiradigan olim. U jurnaldagi globus suratini qaychilaydi va ishlashga xalaqit bermasligi uchun o'g'lining qo'liga tutqazadi. Olim o'ylaydiki, o'g'li globus bo'laklarini uzoq vaqt birlashtiradi.  Aniqrog'i, u dunyo haqida tasavvurga ega bo'lmagan kichkintoyning bu ishni uddalashiga sira ishonmaydi. Qiyqimlarni tezlik bilan bir-biriga mos tarzda elimlagan bola esa olimni hayratda qoldiradi. Ayonki, u o'g'lidan o'ta tezkorlik sababini so'raydi. Ma'lum bo'lishicha, o'g'il o'zi uchun mos yo'lni tanlagan, ya'ni globus orqasidagi odam surati bo'laklarini birlashtirgan. Olim bir varaqning ikki sahifasida globus va odam surati joylashganiga e'tibor qaratmagan ekan. Bola nigohi esa bu imkonni ko'rgan va odam tasviri vositasida o'zi uchun no'malum sanalgan ob'ekt - globusni qayta tiklagan... Qalay? Zo'rmi? Markesga ofarin! Gulchehra Murodovaga rahmat! Faqat dastlabki sahifani o'qish bilan ovora bo'layotganlar uchun yaxshi saboq bu hikoya. Futbol kitobi varaqlarining orqa sahifalarini o'qimayotgan murabbiylar mazkur hikoyaga murojaat qilishsa arziydi. Mutolaa zarur xulosalar uchun asos berishiga ishonchimiz komil. Orqa sahifani ham o'qiy oladigan murabbiylar esa g'alaba bilan yonma-yon. Gonsalo Iguain «Real», Xuan Kuadrado «Chelsi», Mario Madjukich «Bavariya» bag'riga sig'may, sarson bo'lishganini muxlislar yaxshi bilishadi. Vaholanki, ular avvalgi klublarida ham mohir murabbiylar qo'l ostida to'p surishgan. Afsuski, o'sha mohir murabbiylar va yuksak saviyali futbolchilarning yulduzlari o'zaro tutashmadi, ya'ni bir-biriga to'g'ri kelmadi. «Real»dan ketgan Iguainning obro'si tushmadi yoki saviyasi pasaymadi. Aksincha, u avval «Napoli»da qaynab-toshdi, mana, bugun «Yuve»da yuksaklarni ko'zlamoqda. Massimiliano Allegrining yutug'i shundaki, u ko'pchilikning nazaridan nari surilgan shu 3 nafar futbolchining boshini bir jamoada qovushtirdi. O'zini nimalarga qodirligini futbol olamiga qayta isbotlashga chan­qoq iste'dod bunday imkondan yayrab-yashnab ketishi aniq. «Yuventus» murabbiyi «depres­siya»ga uchragan iste'dodli futbolchilar ruhiyatidagi to'lg'oqdan unumli foydalandi. Shuning uchun «Yuventus» Alvaro Morata yoki Pol Pogbaning yo'qligini sezmayapti. Orqa sahifani o'qish - shu. O'tgan mavsumning shu pallasiga solishtirilsa, joriy chempionatda «Yuventus» ochkolar xususida o'sishga erishdi. «Napoli»da esa nisbat deyarli teng. Balki shuning uchun bu jamoa chempionlik uchun oxirigacha kurasholmayotgandir. Aks holda, safarda «Real»ga qarshi munosib o'ynashgan neapolliklar o'z maydonlarida «Atalanta»ga umidsiz holatda imkoniyatni boy bermasdilar. Yana bir muhim jihat shuki, Massimiliano Allegri eng qaltis vaziyatda Leonardo Bonuchchi bilan til topishish ilojini qildi. Antonio Konte esa  Diego Kostani yo'lga solishni uddaladi. Agar bu murabbiylar dastlabki sahifani o'qish bilan kifoyalanib, vaziyatni chigallashtirganlarida, «Chelsi» va «Yuventus» vakillari hozirdanoq chempionlik nafasini tuyishmasdi. Davomi: www.interfutbol.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.