Oliy liganing 2-turida "Paxtakor" Farg'onada "Neftchi" mehmoni bo'ladi. Milliy chempionat tashkil etilganidan buyon Oliy ligada muntazam ishtirok etib kelayotgan uch jamoadan ikkisining to'qnashuvi eng printsipial qarama-qarshilik sifatida e'tirof etiladi. Har ikki klub o'zaro o'yinlarda bir-biridan eng ko'p ochko tortib olgani buni tasdiqlaydi. Jamoalar Oliy ligada 50ta o'yin o'tkazishgan. Kichik ustunlik "Paxtakor" tarafida - 23 g'alaba, 7 durang va 20 mag'lubiyat. Raqib darvozasiga 81 to'p kiritgan "sherlar" 66 to'p o'tkazib yuborishgan. Farg'onadagi bellashuvlarning 15tasida "Neftchi" g'olib chiqqan, 5tadan durang va mag'lubiyat kuzatilgan. Oxirgi ikki mavsumda farg'onaliklar o'z maydonidagi bahslarda zafar quchishgani e'tiborga molik. Jamoalar O'zbekiston Kubogida 15ta uchrashuv o'tkazganlar va "Paxtakor" ularning 12tasida ustun kelgan. 3 bellashuvda raqibning yutug'i kuzatilgan. "Paxtakor-79" xotira turniri va "Toshkent xalqaro turniri" finallarida ham jamoalarning to'qnashuvi ro'y berib, ularda toshkentliklar muvaffaqiyatga erishgan. "Paxtakor"ning eng yirik g'alabasi 6:1, "Neftchi"da esa 4:0 hisoblanadi. Rustam Do'rmonov o'zaro uchrashuvlarda 12ta to'p kiritgan. Shuhrat Maqsudov esa har ikki jamoa tarkibida gol urgan yagona o'yinchi sanaladi. "NEFTChI" - "PAXTAKOR"
Hakamlar: Rustam Bobomurodov (Navoiy), Artyom Kalinin (Qarshi), Andrey Tsapenko (Toshkent viloyati), Daulet Jalimov (Nukus).
Nazoratchi: Rashid Aytekov (Toshkent).
PFL vakili: Ahrol Inoyatov. O'yin 8 mart, chorshanba kuni Farg'onadagi "Istiqlol" stadionida 15:00da start olishi rejalashtirilgan.
— deya xabar beradi uff.uz nashri.