O'zbekistonlik charm qo'lqop ustasi Ulug'bek Haqberiev professional bokschilik faoliyatini boshladi.
Havaskorlar boksida boy tajriba to'plagan hamyurtimiz professional ringdagi dastlabki jangini Rossiyaning Krasnodar o'lkazida tashkil etilgan boks kechasida o'tkazdi.
Ulug'bek Haqberidiev debyut jangini o'zidan ancha tajribali bo'lgan mezbonlar vakili Karen Avetisyanga qarshi o'tkazdi. Karen professional bokschilik faoliyatini 2006 yilda boshlagan bo'lib, shu kungacha 27 ta jangda ringga chiqqan edi.
O'zbekistonlik bokschi tajribali raqibiga qarshi olti raund jang o'tkazdi. Uchrashuv yakunida zarbalar hisob-kitobini olib borgan hakamlar bir ovozda Ulug'bek Haqberdievning g'alabasini e'lon qilishdi.
Eslatib o'tamiz, bokschimiz o'tgan yili "Uzbek Tigers" jamoasi sharafini himoya qilgan.
SPORTS.uz axborot portali professional ringdagi faoliyatini boshlagan bokschimizga faoliyatida omad va g'alabalar tilaydi.
— deya xabar beradi uff.uz nashri.