Ukraina futbol federatsiyasi prezidenti Andrey Pavelko sportdagi korruptsiya bilan bog'liq qonun qabul qilingani munosabati bilan Ukraina chempionatida o'tkazilgan barcha shubhali o'yinlar jiddiy tekshiruvdan o'tkazilishi va aybdorlar jinoiy javobgarlikka tortilishini aytib o'tdi.
"Ukraina futbolini Evropaning etakchi mamlakatlari bilan bir qatorga qo'yadigan qonun qabul qilindi. Unga ko'ra bugundan boshlab nafaqat kelishilgan o'yinlarga qarshi kurash boshlanadi, balki unda ishtirok etgan barcha insonlar va tashkilotlar jinoiy javobgarlikka tortiladi. Ya'ni, aybdorlar ozodlikdan mahrum etiladi yoki yirik miqdorda jarimaga tortiladi.
UFF tomonidan kelishilgan o'yinlar bo'yicha qaror qabul qilindi va endi shubhali o'yinlar borasida surishtiruv ishlari boshlanadi", - deydi Pavelko.
Eslatib o'tamiz, Ukraina chempionatida "Olimpik" ishtirokidagi bir qator o'yinlar shubha ostiga olingan. Biroz vaqt muqaddam esa "Goverla" klubi sobiq hujumchisi Maksim Shatskix kelishilgan o'yinlarda ishtirok etmaganini aytib o'tgan va bunday o'yinlar Rossiyada ko'pligini ta'kidlagan edi.
— deya xabar beradi uff.uz nashri.