Xabaringiz bor, oliy ligamizning so'nggi 2ta turi «Qo'qon-1912» klubi uchun juda omadli keldi. Qo'qonliklar avvaliga o'z maydonlarida «Metallurg»ni mag'lub etishdi. Keyin esa Farg'onada «Neftchi»ni «sensatsion» tarzda engishdi. Albatta, mazkur natijalar hech kimni befarq qoldirmadi va biz muvaffaqiyatning asl sabablarini izlab, klub yordamchi murabbiyi - Muhsin Nizomiddinovni suhbatga tortdik.
- Muhsin aka, avvalo, sizni «Qo'qon-1912»ning so'nggi o'yinlardagi muvaffaqiyatlari bilan tabriklaymiz. Jamoa a'zolarining ayni kayfiyatlarini ikki og'iz so'z yordamida ifodalab bera olasizmi?
- Albatta, kayfiyat juda a'lo. Zero, ketma-ket 2ta o'ta muhim o'yinda g'alaba qozondik. «Metallurg» ham, «Neftchi» ham oddiy jamoa emas, axir. Mana shunday raqiblardan ustun keldik. Bizning o'rnimizda har qanday jamoa ham faxrlangan bo'lardi, albatta.
- «Metallurg» bilan o'yinda kuchlar teng edi, deb hisoblash mumkin. Lekin «Neftchi»ning safarda mag'lub etilishi shubhasiz, ko'pchilikni hayron qoldirdi. Shaxsan siz, «Qo'qon-1912» yordamchi murabbiyi sifatida, g'alabani qaysi omillarga bog'lagan bo'lardingiz?
- Bilasizmi, «Metallurg»ni engganimizdan so'ng yigitlarda o'zlariga ishonch ruhi keskin ortdi. Qolaversa, o'yinning ertasi kuni klubimiz rahbari Baxtiyor aka Topilovning tavallud ayyomini birgalikda nishonlashga kelishib qo'ygandik. Futbolchilar Baxtiyor akaga «syur­priz» tayyorlashga ahd qilishdi va Farg'onada buning uchun astoydil ter to'kishdi. Albatta, ruhiyatni birgina bunga bog'lab qo'ymoqchi emasman. Fakt shuki, yigitlardagi ishtiyoq o'z so'zini aytdi va ular o'z niyatlariga erishishdi. Darvoqe, «Neftchi»ga qarshi o'yinga juda jiddiy yondashganimizning yana bir sababi bor: azal-azaldan bitta viloyat vakillari to'qnash kelishsa, barcha uchun bosh jamoa albatta, g'olib chiqishi shartdek tuyuladi. Jumladan, kechagi o'yin­dan oldin ham shunday fikrlarni  eshitdik. Lekin biz toza va haqiqiy, tomoshabop futbol tarafdori ekanligimizni ko'rsatib qo'­yishni xohladik. Natijaga o'zingiz guvoh bo'lib turibsiz...
- «Qo'qon-1912» negadir mavsum oxiriga kelib, kuchaya­yotgandek... Buni qanday izohlaysiz?
- Sababi oddiy: garchi jamoamiz oliy liga uchun debyutant hisoblansada, mavsum davomida ancha shakllanib ulgurdi. Futbolchilar hozirgi paytga kelib, bir-birlarini a'lo darajada tushuna boshlashdi. To'g'risini aytsam, mavsum avvalida va davralar oralig'ida tarkibga o'zimiz istagan nomzodlarni kiritolmadik. Chunonchi, ba'zilar bilan shartnoma borasida kelisholmadik, yana kimlardir niyatlarimiz jiddiy ekaniga ishonqiramay qarashdi. Vaholanki, «Qo'qon-1912» ayni payt moliyaviy jihatdan anchagina barqaror klublardan biridir. To'g'ri, byudjetimiz o'ta katta emas. Lekin futbolchilarga «Neftchi» ustidan qozonilgan g'alaba uchun mukofot pullari berilmadi, xolos. Maoshlar to'liq va vaqtida berib borilyapti. Ortiqcha muammolardan xoli jamoada futbolchilar uchun o'zlarini ko'rsatishdan boshqa ish qolmaydi, hisob. Qisqasi, yutuqlarga jamoaning tobora shakllanib borayotganini sabab sifatida ko'rsataman.
- Ma'lumki, yaqindagina yosh murabbiylar uchun tashkil etilgan o'quv-kurslarida qatnashib qaytdingiz. Xo'sh, bu jarayonda o'zingiz uchun nimalarni kashf qildingiz?
- Shaxsan mening bilganim shuki, murabbiy sifatida futbolda o'qib-o'rganadiganlarim hali juda ko'p ekan. Ochig'i, o'quv dasturi shunchalik qiziqarli kechishini kutmagandim. Ustozlar, xususan, Islom aka Ahmedovdan zamonaviy futboldagi yangiliklar, maxsus dasturlar haqida tushuncha olgach, menda savollar nihoyatda ko'pa­yib ketdi. Imkon qadar bilmaganlarimni so'rab, o'rganishga harakat qildim. Mendagi qiziqish ularning ham e'tiborini tortdi, shekilli, kaminaga alohida dastur bo'yicha 3 yil ta'lim olishni maslahat berishdi. Imkoniyatim bo'lsa, albatta, taklifni o'ylab ko'raman. Eng muhimi, olgan bilimlarim o'zbek futboli rivojiga naf keltirsa, bas.
Davomi InterFUTBOL gazetasi blogida.
— deya xabar beradi uff.uz nashri.