Bundan bir necha daqiqalar oldin Farg'onadagi "Istiqlol" stadionida Oliy liga bahslarining 2-turidan o'rin olgan "Neftchi" va "Paxtakor" jamoalari bahsi yakunlandi. Uchrashuv 0:0 hisobidagi durang bilan yakunlandi.
O'yindan so'ng o'tkazilgan matbuot anjumanining ikkinchi qismida "Neftchi" bosh murabbiyi Andrey Fyodrov qatnashdi va o'zining o'yin haqidagi fikrlarini bildirib o'tdi.
- "Sho'rtan"dagi omadsiz startdan so'ng ushbu bahsga jiddiy tayyorgarlik ko'rgan edik. Qolaversa, ushbu o'yinda tarkib va taktik jihatdan o'zgarishlar qildik. O'yin kutganimizdek qiyin kechdi. Ta'kidlash kerakki, bugun "Paxtakor"da ham, bizda ham gol urish uchun imkoniyatlar ko'p bo'lmadi. Boisi, biz ham, raqibimiz ham himoyada tartibli va ishonchli o'ynadik. O'yin so'nggida har ikkala jamoada ham gol urish uchun juda qulay imkoniyat bo'ldi. Ammo, bu vaziyatlarda omad etishmadi.
Shunday bo'lsada o'z oldilariga qo'yilgan vazifani to'liq bajarginliklari uchun yigitlarga rahmat aytaman. Yuqoridagilardan kelib chiqib bugungi natijani qaysidir ma'noda adolatli deyish mumkin. Qolaversa, bugun bizni qo'llab-quvvatlash uchun stadionga kelgan muxlislarga o'z minnatdorchiligimni bildiraman. Anchadan buyon bu qadar ko'p tomoshabin kelmagan edi. Ularning bugungi qo'llab-quvvatlashlari bizga madad bo'ldi.
Har yilgi mavsumda "Neftchi” murabbiylarining quloqqa o'rganib qolgan so'zlari ya'ni «bu mavsumdagi asosiy maqsadimiz - har bir o'yinda g'alaba qozonish» shiori bu mavsumda biroz jiddiyroq va aniqroq tusga kirdi chog'i. Jamoa bosh murabbiyi bu yilgi mavsumdagi farg'onaliklarning qo'lga kiritilishi zarur bo'lgan asosiy maqsadini bayon etdi.
- Albatta, har bir o'yinda g'alaba qozonish jamoamizning amalga oshirishi zarur bo'lgan muhim rejasidir. Shu bilan birgalikda "Neftchi” klubining bu yilgi ustuvor maqsadi bu - medallar uchun kurashishdir. Biz bu yilgi mavsumni kuchli uchlikda yakunlash uchun harakat qilamiz, deydi - Andrey Fyodorov.
— deya xabar beradi uff.uz nashri.