"Dinamo" - "Sho'rtan" (3:0) uchrashuvidan so'ng, "Dinamo" bosh murabbiyi Oleg Tyulkin jurnalistlar savollariga javob qaytardi. - Samarqanddagi ajoyib futbol atmosferasida muxlislarga ajoyib bayramni tortiq eta olganimizdan juda xursandman. Yigitlarimizni Bekoboddagi o'yinni unutib, «Sho'rtan»ga qarshi puxta tayyorgarlashga intildik. Jamoadagi har bir futbolchi bugun o'z ishini a'lo darajada bajardi. Yigitlar juda hamjihatlik bilan to'p surib, g'alabaga erishishdi. Muxlislarning tinmay qo'llab-quvvatlashlari ostida to'p surib, yirik hisobda g'alabaga erishish juda yoqimli. Futbolchilarimiz minglab ishqibozlar ko'z oldida bosimda to'p surgan bo'lishsada, maydonda borlarini ko'rsatishdi. - Dastlabki o'yindan taassurotlaringiz qanday? - Bilasizmi, bugungi futbol bayramida muxlislarimiz kayfiyatini ko'tarishimiz shart edi. Ma'suliyatni tushungan holda maqsadimizga erishdik deb o'ylayman. Samarqand ahli bir yil Birinchi Ligada to'p surib, Oliy Ligani sog'inib qolganligini bugun ko'rdik. Futbol mana shunday muxlislar bilan go'zaldir. O'yin adolatli natija bilan tugadi. - Jamoaning asosini 20-23 yoshli yigitlar tashkil etishmoqda. Ularni o'yinlarga tayyorlash qiyin bo'lsa kerak? - "Dinamo" bu yil yoshlarga ishonch bildirmoqda va bu yo'lda murabbiylar shtabi futbolchilarga imkoniyat berishga intilmoqda. Bizda iqtidorli yigitlar juda ko'p. Ularga shu yo'sinda imkon berib, kamol topishi uchun qo'llab-quvvatlasak Samarqand futboli yanada yangi marralarni egallashi mumkin bo'ladi. - Keyingi o'yinda Toshkentda "Paxtakor"ga qarshi bahs oson bo'lmaydi… - Biz uchun har bir o'yin bitta sinov va katta tajriba bo'ladi. Hozir peshqadam bo'lsakda, jamoaning hozirgi tarkibi to'liq yig'ilganligiga hali bir oy bo'lmadi. Ammo tarkibda tanlagan har bir futbolchi birinchi navbatda o'zini ko'rsatishni, mehnat qilishni istaydigan yigitlardir. O'yinga ishtiyoq juda kuchli. "Paxtakor"ga qarshi bahsda ham yigitlar muxlislarni quvontirish uchun maydonda borlarini berishadi, kurashishadi.
— deya xabar beradi uff.uz nashri.