Evropa Chempionlar Ligasining seshanba kungi bahslaridan so'ng dastlabki chorak finalchilar nomi ma'lum bo'ldi. Unga ko'ra, Madridning «Real» va Myunxenning «Bavariya» klublari mazkur bosqich yo'llanmasini qo'lga kiritishdi. Shu o'rinda aytish joiz, «Real» qatorasiga 7-bor, «Bavariya» esa 6-marta chorak finalga chiqmoqda. Neapoldagi «San-Paolo» stadionidagi bahs Madriddagi uchrashuvdan ham qiziqarliroq kechdi. Maydon egalari ilk daqiqalardanoq «Real» futbolchilariga nisbatan kuchli pressing uyushtirib, dadil oldinga tashlanishdi. Sarri shogirdlari tomonidan amalga oshirilayotgan bosim, nihoyat 24-daqiqada o'z samarasini berdi. Maydon egalari chap qanotdan jarima maydonchasiga kirgan Mertensni to'p bilan ta'minlashdi va hujumchi birga-bir vaziyatda o'tkir burchak ostida to'pni darvozaga joyladi. Birinchi bo'lim hayajonli daqiqalarga boy bo'lgan bo'lsa, ikkinchi bo'limning boshida to'qnashuv taqdirini bir futbolchi hal qilib qo'ya qoldi. Ikkita burchak to'pi, ikki marta bosh bilan berilgan zarba va ikkita gol! Serxio Ramos ijrosida! Ammo ikkinchi gol Mertens hisobiga avtogol sifatida yozildi. Bu gollar «Napoli» shashtini butunlay sindirib qo'ydi. Bitta gol ursa, keyingi bosqichga chiqishi mumkin bo'lib turgan jamoa endi 4ta gol ura olmasdi. Boz ustiga, qo'shib berilgan daqiqalarda Alvaro Morata jamoasining uchinchi goliga mualliflik qildi. Ta'kidlash joiz, Serxio Ramo «Real» safida evrokuboklardagi 100-o'yinini o'tkazdi. Himoyachi buni gol bilan nishonladi. Shu bilan birga gol urish bobida madridliklar afsonasi Fernando Yerroni ortda qoldirdi. «Arsenal» esa o'z maydonida «Bavariya»dan qaqshat­qich mag'lubiyatni qabul qildi. Uchrashuvning 20-daqiqasida Teo Uolkot bellashuvda hisobni ochib, londonlik muxlislarni xursand etdi. Ammo inglizlarning quvonchi bor-yo'g'i bir taymga etdi. Ikkinchi bo'limda nemis mashinasini to'xtatishning mutlaqo ilojisi qolmadi. Hammasi «Arsenal» himoyachisi Loran Koselnining maydondan chetlatilishi ortidan boshlandi. Levandovski penaltidan muvozanatni tiklagan bo'lsa, Robben va Duglas Kosta o'z hisoblariga gol yozishga erishishdi. O'yinning so'nggi 10 daqiqasida londonlik himoyachilarning qo'pol xatolaridan keyin Arturo Vidal ikki bor Ospina qo'riqlayotgan darvozani aniq nishonga olib, hisobni butkul yirik ko'rinishga keltirdi - 1:5. Davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.