Evropada dam olish kunlari milliy chempionat o'yinlarining navbatdagi tur uchrashuvlari bo'lib o'tdi. Furkat.uz sayti o'z an'anasiga sodiq qolgan holda o'ziga xos norasmiy “Oskar”larni o'z egalariga topshiradi. Bu safar “Jasorati uchun”, “Eng yaxshi aktrisa” kabi yangi nominatsiyalar ham qo'shilganini ta'kidlab o'tish joiz.
“Eng yaxshi film”
Bundesliga yaxshi “film”larni ko'p chiqarmoqda. “FK Gollivud” o'z maydonida Dortmundning “Borussiya”sini har taraflama yanchib tashladi. “Film” ancha shiddatli kechdi. Kartina muvaffaqiyatida bosh qahramonlar Myuller va Levandovskilarning ham qissalari beqiyos bo'ldi.
“Eng yaxshi serial”
“Xayr Rodjers”. “Liverpul” ustozi Rodjersning ertagi tugadi. Mavsumni yaxshi o'kaza olmayotgan “qizillar” murabbiylaridan voz kechib qo'ya qolishdi. Brendan ushbu serialdagi ishi uchun 7 million evro bonusga ham ega chiqdi.
“Eng yaxshi tryuk”
Jazoir terma jamoasi darvozaboni Malik Aselloh ichki chempionat o'yinlarining birida o'z jarima maydonchasi ichida afsonaviy Zidan fintini muvaffaqiyatli amalga oshirdi. Garchi uning jamoasi o'sha kuni mag'lub bo'lgan bo'lsa ham, posbonning jasoratiga tan bermasdan iloj yo'q.
“Jasorati uchun”
Yangi nominatsiyaning ilk g'olibi Belgiyaning “Mexelen” klubi posboni Jan-Fransua Jille bo'ldi. U “Anderlext”ga qarshi uchrashuvda bir emas, ikki emas, balki uch nafar futbolchi tomonidan tepilgan penaltilarni barataraf etdi. Golkiper 7 daqiqada Pretea, 14 daqiqada Okaka Chuka va 89 daqiqada Tilemasnsning 11 metrlik zarbalarini bartaraf etib, haqiqiy jasorat ko'rsatdi.
Maxsus sovrin
PSJ hujumchisi Zlatan Ibragimovich tanqidchilarning og'izlarini vaqtincha bo'lsa ham yopib qo'ydi. Shvetsiyalik “Marsel”ga qarshi bahsda ikkita penaltidan unumli foydalanib, Parijliklar safidagi 110-golini kiritdi va klub tarixidagi eng sermahsul futbolchiga aylandi. Ana endi Zlatan bemalol o'zini superqahramon deb o'ylasa bo'laveradi.
“Eng yaxshi rejissyor”
Bu haftada mazkur nominatsiya g'olibligiga ko'plab “rejissyorlar” davogarlik qilishdi. Sovrinni Evropaning amaldagi eng kuchli jamoasini mag'lub etgan jamoa murabbiyiga bermasak uyat bo'lardi. Unai Emeri o'z faoliyati davomida ilk bora “Barselona”ni taslim qildi. Umid qilamizki “Soutgempton”, “Bavariya”, “Napoli” va “Arsenal” murabbiylari bizdan xafa bo'lishmaydi.
“Eng yaxshi aktrisalar”
Mazkur nominatsiya bo'yicha Gollivudliklar emas balki Osiyolik “aktrisalar” g'olib chiqishdi. Eron ayollar terma jamoasining 8 nafar futbolchisi jinsini o'zgartirish bo'yicha kutayotgan erkakalar ekanligi aniqlandi. Ajabo 8 nafar erkak, ayol obrazini shu qadar mahorat bilan ijro etishdiki, sal bo'lmasa ularni haqiqatdan ham ayol deb o'ylardik. Biroq haqiqat deganlari egilgani bilan sinmas ekan.
“Eng yaxshi yosh aktyor”
Asli “Barselona”ga tegishli bo'lgan Alen Xalilovich ayni paytda Xixonning “Sporting” jamoasida ijara asosida to'p surmoqda. U “Espanol”ga qarshi uchrashuvda La Ligadagi gollari sonini ochdi. 19 yoshli xorvatiyalik vunderkind shu tariqa o'ynashda davom etsa, kelasi mavsumni Kataloniyaliklar tarkibida boshlashi mumkin.
Davomi Furqat Yusupov blogida.
— deya xabar beradi uff.uz nashri.