Biroz avval Oliy liganing 2- turi “Qizilqum” – “Navbahor” uchrashuvi bilan o'z nihoyasiga etdi. Navoiyda kechgan uchrashuv mezbonlarning g'alabasi bilan yakun topdi. Birinchi bo'limda mezbonlar tezkor gol urishni uddasidan chiqishdi. Jasur Hasanov o'ng qanotdan to'pni jarima maydonchasiga etkazib bergach, Azamat Allaniyozov “Navbahor” darvozasini aniq nishonga oldi, 1:0. O'yindagi hisobni “Qizilqum” ochgani futbolchilarimizni sarosimaga solmadi. Aksincha, “navbahorchilar” vaziyatni o'nglash maqsadida hujum tashkil etishga intilishdi. Bu urunishlar taym o'rtalariga kelib o'z samarasini keltirdi. Saidov o'zi boshlagan hujumni gol bilan yakunladi. Qilichev qarama-qarshi qanotda to'pni Saidovga etkazib berdi. Mansurning zarbasini Xonimqulov ushlab qolishni uddasidan chiqa olmadi. Uning qo'lidan chiqib ketgan to'p chiziqni kesib o'tdi. Golda Saidov-Yovanovich-Mehmonov-Qilichevlar chiroyli kombinatsiya tashkil etishganini ham e'tirof etish joiz. Tanaffusga qadar har ikki jamoa vakillarida hisobni o'zgartirish uchun qulay imkoniyatlar vujudga kelgandi. Ammo “Qizilqum” va “Navbahor” himoyachilari bunga yo'l qo'yishmadi. Ikkinchi bo'lim jamoamizning folligi bilan boshlandi. Taymning dastlabki 15 daqiqasi “Navbahor” ustunligida o'tdi, biroq bu hisobda aks etmadi. Navoiyliklar esa asosan qanotlardan hujum tashkil qilishdi. 77- daqiqada mezbonlarning ushbu rejalari ularga foyda keltirdi. Sherali Jo'raevning chap qanotdan uzatib bergan to'pini Ilhom Yunusov boshi bilan Amanov qo'riqlagan darvozaga joylab qo'ydi, 2:1. O'yin oxirigacha futbolchilarimiz hisobni tenglashtirish uchun astoydil harakat qilishdi. Lekin, barcha urunishlar samarasiz yakunlandi. Shu tariqa “Navbahor” Oliy liganing joriy mavsumida dastlabki mag'lubiyatni tan oldi. Navbatdagi uchrashuvni jamoamiz 18- mart kuni Farg'onaning “Neftchi” jamoasiga qarshi o'z maydonida o'tkazadi.
“Qizilqum” – “Navbahor” 2:1 (1:1). 10 mart 2017 yil. Navoiy. “Yoshlar” sport majmuasi. 7565 tomoshabin.  Hakamlar: V. Serazetdinov, A. Sidorov, D. Saylavov, A. Risqullaev.  Gollar: A. Allaniyozov (5), I. Yunusov (77) – M. Saidov (27) “Qizilqum”: 16. Umid Xonimqulov, 3. Shukurali Po'latov, 4. Erkin Boydullaev, 10. Vohid Shodiev, 14. Fayzullo Qambarov, 15. Azamat Allaniyozov (77. Begzod G'anijonov, 89), 17. Artur Gevorkyan, 19. Jasur Hasanov (9. Otabek Zokirov, 90+2), 23. Sherali Jo'raev, 25. Azizbek Usmonov, 27. Ilhom Yunusov. “Navbahor”: 30. Asilbek Amanov, 2. Alisher Samatov (77. Azizbek Turg'unboev, 81), 5. G'iyos Komilov, 7. Oybek Qilichev (33. Tohir Shamshitdinov, 87), 9. Dilshod Jabborov, 10. Mansur Saidov (22. Ro'zim Ahmedov, 75), 19. Mirzohid G'ofurov, 21. A'zam Aliev, 32. Jahongir Mehmonov, 44. Darko Stanoevich, 84. Nemanya Yovanovich. 
Ogohlantirishlar: F. Qambarov (20) – A. Aliev (31), J. Mehmonov (43), A. Samatov (79), R. Ahmedov (89). Nazoratchi -  G'. Karimov. PFL vakili - B. Haydarov. 
— deya xabar beradi uff.uz nashri.