"Qizilqum" - "Navbahor" uchrashuvidan so'ng tashkil etilgan matbuot anjumanida namanganliklar bosh murabbiyi Ilhom Mo'minjonov jurnalistlar savollariga javob berdi:
- Bugungi o'yinda mag'lubiyatga loyiq emasdik. "Qizilqum" jamoasida ikkita vaziyat bo'ldi va bundan navoiyliklar foydalanib, bizga gol urishdi. Ikkinchi bo'limda o'tkazib yuborgan golimiz bizga og'ir botdi. Yigitlar yaxshi o'yin namoyish qilishdi, berilgan ko'rsatmalarimni to'g'ri bajarishdi, ammo omad bizga kulib boqmadi. Birinchi bo'limda hisob tengligida bizda golga tortadigan xavfli vaziyat bo'lgandi.
Mansur Saidov bu xolatda to'pni Nemanya Yovanovichga berishni afzal bildi. Shuni biz golga aylantirishimiz kerak edi.
Bu futbol... Maydon tekis, to'p yumaloq. Avval ham ta'kidlaganimdek jamoaga taklif etilgan futbolchilardan faxrlanaman. Men chaqirgan o'yinchilar o'yindan-o'yinga chiroyli futbol namoyish etib, muxlislarimizga g'alabalarni tortiq etishadi. Klubga jalb etilganlar bilan hali ko'p yutuqlarga erishamiz.
Bugun bizga omad etishmadi. O'yin tugashiga 15 daqiqa qolganida to'pni nazorat qilish bizda bo'lgani va raqibga bosim o'tkazish kerakligi sababli Mansur Saidovning o'rniga Ro'zimboy Ahmedovni maydonga tushirdim. Ikki hujumchi bilan o'yin uslubiga o'tdik. Kamchiliklarimizdan to'g'ri xulosa chiqargan xolda keyingi bellashuvga tayyorgarlik ko'ramiz. "Qizilqum" maydoni bugun ideal xolatda ekanini aytishim lozim. Har bir o'yingohdagi maydon shunaqangi bo'lishini istardim".
— deya xabar beradi uff.uz nashri.