O'zbekiston chempionatining 1-tur bahslari odatiy o'tdi, kutilmagan natijalar deyarli ro'y bergani yo'q. «Dinamo» safarda «Metallurg»ni mag'lub etganini (0:2) hisoblamasa, boshqa aytarli hech gap bo'lmadi. Etakchilar g'alaba qozongan, autsayderlar esa bir chetdan mag'lubiyatga uchragan turda bizning e'tiborimizni natijadan ham ko'ra boshqa narsa ko'proq tortdi. «Neftchi» bosh murabbiyi Andrey Fyodorov «Sho'rtan»ga qarshi kechgan va 0:1 hisobidagi mag'lubiyat bilan yakuniga etgan o'yindan so'ng bir fikr bildirdi. «Mavsumda qolgan 29ta o'yinda g'alaba qozonsak ham chempion bo'lamiz», dedi murabbiy. «Neftchi»ning tarkib va moliyaviy salohiyat jihatidan chempionlikka da'vogarlar safida emasligini inobatga olsak, murabbiyning gapida jiddiylikdan ko'ra hazil ko'pligini ko'rish mumkin. Ammo har tomondan qolipdan chiqqandek bir xil va oddiy fikrlar yangrayotgan vaqtda shu ham kishining ko'nglini ko'tarib yuborar ekan. Yillar davomida futbol atrofidagi yangiliklarni yoritib yurgan inson uchun o'yindan so'ng o'tkaziladigan matbuot anjumanlari ko'p ham qiziqishni saqlab qola olmaydi. Bir xil gap-so'zdan kishi ancha zerikadi. Qaysi murabbiy qay bir o'yindan so'ng nima deyishigacha oldindan bilib olasiz. Aytaylik, g'alabadan so'ng ham, mag'lubiyatdan keyin ham aytiladigan gaplar deyarli bir xil. Xuddi qolipdan chiqqandek. Futbol esa muxlislar uchun o'ynaladi. U o'ziga xos shou. Demak, matbuot anjumanlari ham shunga yarasha qiziqarli o'tishi lozim.  Andrey Fyodorov birozgina qolipdan chetga chiqqan edi hamki, uning bu gapi haqida alohida maqola yozilmoqda. O'ylab qarasak, futbolimizga aynan shunday mutaxassislar etishmas ekan. Murabbiylar ortiqcha gapirib qo'yishdan cho'chishadi. E'tibor bersangiz, Evropadagi kuchli chempionatlarda jamoa ustozlari uchun qaysidir mavzuda keskin fikr bildirish oddiy hol hisoblanadi. Taqvimdan norozi bo'layotgan Joze Mourinoni, hamkasbini tanqid qilayotgan Arsen Vengerni va ularning ikkisiga ham javob qaytarayotgan Xosep Gvardiolani deyarli har hafta ko'rish mumkin. Yoki bo'lmasa «Atletiko» bosh murabbiyi Diego Simeone «Real» yoxud «Barselona»ning hakamlar yordamida g'alaba qozonishini aytishdan aslo tortinmaydi. Bunga javoban qarshi tomon ham nimalardir deb yuborishdan o'zini tiymaydi. Bu esa, o'z navbatida, chempionatga bo'lgan qiziqishni ham oshiradi, o'zaro raqobat qizg'in ko'rinish olishini ta'minlaydi. Axir millionlar o'yini uchun shu kerak emasmi? Bizda ham bor edi shunday murabbiylar. Aytaylik, O'zbekiston milliy terma jamoasi va «Lokomotiv» bosh murabbiyi Vadim Abramov ishtirokidagi matbuot anjumanlariga o'zgacha qiziqish bilan kirar edik. Afsuski, murabbiyning «temiryo'lchilar» boshqaruvidagi faoliyati omadli kechmadi va iste'foga chiqarildi. Biroq Vadim Karlenovich ko'nglidagi gapni qo'rqmay ayta olishi bilan ham o'zbek futboli rivojiga katta hissa qo'shganini e'tirof etish lozim. Murabbiy o'rni kelganda PFLni ham tanqid qila oldi, taqvim va hakamlar haqida aytgan gaplari hamon yodimizda. Uning e'tirozlari qay darajada o'rinli yoki o'rinsiz ekani ikkinchi darajali masala, muhimi murabbiy bu gaplari bilan oliy ligadagi intrigani kuchaytira olardi. Bu esa hammaning ham qo'lidan kelavermaydigan juda katta ishdir. Hozir oliy liga klublarida ishlayotgan biror murabbiyning mana shunday dadillik ko'rsata olishiga ishonasizmi? Tan olish lozim, O'zbekiston chempionatiga bo'lgan qiziqish so'nggi yillarda biz kutgan darajada emas. Shunday ekan, oliy liga saviyasini ko'tarish kimning qo'lida? Albatta, murabbiy va futbolchilarning. Futbolchilar yaxshi o'ynab tursa, murabbiylar bir xillikdan qutulib, matbuot anjumanlarida keskinlikni oshiradigan gaplardan aytib turishsa, nahotki muxlislar tashrifini ko'tarish imkoniyati yo'q? Davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.