Xabaringiz bor, shu kunlarda Andijon viloyatida mamlakatimiz futbol maktablari tarbiyalanuvchilaridan iborat jamoalar o'rtasida mamlakat birinchiligi bo'lib o'tmoqda. Unda viloyatimizdan «Nasaf» PFK qoshidagi Nishon futbol maktabining Xasan Muhsinov rahbarligida va Dilyor Choriev boshqaruvidagi 2004-2005 yillarda tug'ilgan tayyorlov guruhi va “Sho'rtan” PFK qoshidagi Shahrisabz futbol maktabi Suhrob Sattarov murabbiyligidagi tayyorlov guruhlari ishtirok etishmoqda. Kecha 4 noyabr kuni musobaqaning “A” guruhidan joy olgan nishonlik yosh “nasaf”chilar birinchi uchrashuvini o'tkazishdi. Vohalik yosh futbolchilar Samarqandlik tengdoshlariga qarshi bahsda maydonga chiqishdi va vakillarimiz uchrashuvni yirik 4:0 hisobida g'alaba bilan yakunlashdi. Kecha shuningdek ikkinchi jamoamiz shahrisabzlik yosh ”sho'rtan”chilar ham o'z guruhida birinchi uchrashuvini Namanganning ”Navbahor” jamoasiga qarshi o'tkazdilar. Keskin va murosasiz kechgan uchrashuvda shahrisabzlik yosh charm to'p ustalari raqiblariga 2:0 hisobida imkoniyatni boy berib qo'yishdi. Bugun nishonlik yosh charm to'p ustalari saralash bosqichining ikkinchi bahsida poytaxtning “Paxtakor” klubi tarbiyalanuvchilariga qarshi maydonda saf tortishadi. “B” guruhidagi Suhrob Sattarov murabbiyligidagi “Sho'rtan” jamoasi bugun dam oladi. Ushbu musobaqada vohamiz sharafini himoya etayotgan jamoalarimiz ishtiroki haqidagi xabarlarni keyingi sahifalarimizda ham kuzatib borishingiz mumkin bo'ladi. Faxriddin Choriev
— deya xabar beradi uff.uz nashri.