O'zbekiston terma jamoasi va Moskvaning «Lokomotiv» klubi himoyachisi Vitaliy Denisov Evropa chempionlar ligasining 1/8 finalidan o'rin olgan "Barselona" – «PSJ» (6:1) uchrashuvi haqidagi savollarga javob berib o'tdi. – "Barselona" - PSJ uchrashuvi haqida qanday fikrdasiz? – Ochig'i, so'z topishga ojizman. PSJ futbolchilari holatini tasavvur qilish juda qiyin, beshinchi goldan so'ng yana oltinchi golni o'tkazib yuborish o'ta alamli holat. Bunday o'yinlar 1000 ming yilda bir marta bo'lib o'tadi. – O'yindan keyin "Barselona"ning keyingi bosqichga yo'l olishida hakam yordami bilan yo'l olgani haqida e'tirozlar paydo bo'ldi. Bunga nima deya olasiz? – Ikkinchi penalti belgilangan vaziyatda, har bir kishida savol kelib chiqadi. Menimcha, penalti yo'q edi. – Maskeranoning Di Mariyaga ko'rsatgan qo'polligini qanday tushunish mumkin. Hatto, Xaver o'yindan so'ng qo'pollik ishlatganini o'zi ham tan oldi. – Rostini aytadigan bo'lsam, vaziyatni takroriy holatini ko'rib chiqmadim. Maskerano Di Mariyaga eta olmasdan unga orqadan qo'pollik ko'rsatganini eslay olaman. Gol bo'ladigan vaziyatda to'p birdan noto'g'ri yo'nalish oldi. Agar to'pni qanday traektoriyada yo'l olganiga qarab vaziyatga baho beriladigan bo'lsa, albatta bu holatda o'yin qoidasi buzilgan edi.
— deya xabar beradi uff.uz nashri.