Toshib o'yna, dovonlardan oshib o'yna! Osiyo kubogi-2011dan avval shunday sarlavha ostida mulohaza yozgandik. Kuni kecha poytaxtlik fidoiy futbol muxlisi Azizbek o'sha maqolani eslatdi. «Toshib o'ynashsa, dovonlardan oshib o'ynashsa, yigitlarimiz Suriya va Qatar terma jamoalarini engishga kuch topishadi. Mabodo dovon oshishga ko'zlari etmasa, tog'ni teshib o'tib, mundial yo'llanmasini qo'lga kiritishsin!»-dedi u hayajon bilan. Muxlisning nazarida, Eron va Janubiy Koreya terma jamoalariga qarshi kechadigan bahslar futbolchilarimiz uchun go'yo tog' kabidir. U milliy jamoa­miz, vaziyat taqozo etsa, shu tog'ni teshib o'tishini istayapti. Tog'ni teshish asnosida manzilga etish, maqsadga erishish - g'oyat murakkab ish. Fikrimizcha, bu murakkablik ko'lamini ta'riflash ortiqcha. Chunki Angren - Pop temir yo'l tunelining qurilishi hammaning ko'z o'ngida butun dunyoni hayratlantirdi. Qisqasi, xal­qimizning tog'ni tesha olish qudrati sinovdan o'tdi va g'alaba bilan tugadi. Shunday qudratli xalq vakili bo'lmish futbol muxlisi Samvel Babayan shogirdlarini tog'ni teshishga, ag'darishga chorlashi, hattoki, ularga shunday talab qo'yishi mantiqqa mos. Zamonamiz Farhodlari sha'niga tahsin o'qigan muxlis futbolchilarimizdan ham ulug' g'alaba kutishga haqli. Muxlisning qalbida bugun g'alaba, mundial olovi guldirab yonmoqda. U JCh-2018 yo'llanmasiga ega chiqish ishtiyoqidan sarmast. Xullas, muxlis hozir sururbaxsh orzular og'ushida yashayapti. To'g'ri, vaziyatni real baholashga urinadiganlar, necha bor «og'iz kuydirganlar» nainki qatiq, balki muzlatkichdagi suvni ham har ehtimolga qarshi puflab ichuvchilar uni surur osmonidan erga tushirmoqni o'ylaydilar. Ammo muxlis bunga ko'nmayapti. Uning qalbidagi ishtiyoq olovi so'nmas. U ishonchda sobit va purviqor. Ta'bir joiz bo'lsa, muxlis qalbidagi ishonch purviqorligidan Eron va Janubiy Koreya terma jamoalari kabi tog'lar titraydi. Hamma gap endi milliy jamoamizdagi ishtiyoqda. Server Jeparov Suriya termasi ustidan ishtiyoq evaziga g'alaba qozonish mumkinligini ta'kidladi. Mohir futbolchimiz nazarda tutayotgan ishtiyoq nima o'zi? Bizningcha, ishtiyoq - futbolchi vujudida mudrab, yashirinib yotadigan, har doim ham yuzaga chiqavermaydigan, izohlash qiyin bo'lgan kuch. Bu kuch uyg'onsa, futbolchi Alpomishning Boychibori kabi har qanday to'siq-g'ovni yanchib tashlaydi, tushovlarni uzib, raqib darvozasi tomon otadi. Maydonda og'irlashgan oyoqlar bu kuch ta'sirida to'pni boshqacha shiddat, o'zgacha aniqlik bilan tepadi. Futbolchi o'zida shunday kuch-ishtiyoq uy­g'onishini qo'msayapti. Afsuski, qo'msash yoki istashning o'zi bilan ish bitmaydi. Futbolchi harchand harakat qilmasin, istamasin, aksar hollarda unda kuchli ishtiyoq uyg'onmaydi. Shunday vaziyatda asosiy yuk murabbiy zimmasiga tushadi. Boshqacha aytganda, o'yin saviyasi murabbiyning futbolchilardagi ishtiyoqni qay darajada uyg'otish mahorati bilan belgilanadi. Ishtiyoq olovi osmonu falakka ko'tarilsa va o'yin bilan bog'liq boshqa omillar o'zaro muvofiqlashsa, demak, o'sha jamoada g'alaba naqd. Xo'sh, «Barselona» g'alabasining mo''jizaviy siri nimada? Davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.