Bugun jamoamiz O'zbekiston chempionati 3- tur o'yinlari doirasida Farg'onaning “Neftchi” jamoasini o'z maydonida qabul qildi. Murosasiz o'yinda g'olib nomi aniqlanmadi. Birinchi bo'limni jamoamiz hujumkor ruhda o'tkazdi. Futbolchilarimizning ijro etgan burchak to'plari va qanotdan tashkil etilgan hujumlari keskin va xavfli chiqdi. Ayniqsa 21- daqiqada Oybek Qilichevning yo'llagan zarbasi, 30- daqiqada burchak to'pi o'yinga kiritilgach G'iyos Komilovda bo'lgan imkoniyatni aloxida belgilash lozim. “Neftchi” vakillarining 25- daqiqada vujudga keltirgan xavfli vaziyati esda qolarli bo'ldi. Muzaffar Muzaffarovning ijro etgan jarima to'pi ham xavfli chiqqanini ta'kidlash lozim. “Navbahor”dan Nemanya Yovanovich va Mansur Saidovlar ham gol urishga yaqin kelishdi. Biroq uchrashuvda hisobni ochish mehmonlarga nasib etdi. 41- daqiqada “Neftchi” legioneri Dmitriy Komarovskiy burchak to'pi o'ynga kiritilgach Amanov darvozasini ishg'ol qildi, 0:1. Tanaffusga jamoalar shu hisobda yo'l olishdi. Ikkinchi bo'limda maydon egalari vaziyatni o'nglash maqsadida “Neftchi” darvozasiga qator xavfli zarbalarni yo'llashdi. Lekin har gal Saidov va Yovanovichdan omad yuz o'giraverdi. Uchrashuvda “navbahorchilar” asosan qanotlardan jarima maydoniga bo'ydor Nemanya Yovanovichga to'p uzatish taktikasini qo'llashdi. Bu esa 76- daqiqaga kelib foyda keltirdi. Qanotdan oshirilgan to'pdan keyin Hamza Karimov hujumchimizni qo'pollik ishlatib to'xtatdi. Ravshan Ermatov ikkilanmay penalti belgiladi. 11 metrli jarima zarbasini jabrlanuvchining o'zi bexato amalga oshirib, hisobni tengladi, 1:1. Uchrashuv oxirlarida futbolchilarimiz g'alaba to'pini kiritishga astoydil harakat qilishdi. Lekin bunga vaqt va vaziyatlardan samarali foydalanish kamlik qildi. Shu tariqa “Vodiy derbisi” maqomidagi o'yin durang bilan yakun topdi. “Navbahor” – “Neftchi” 1:1 (0:1). 16 mart 2017 yil. Namangan. “Markaziy” o'yingoh. 18992 tomoshabin.
Hakamlar: R. Ermatov - 9,0, A. Rasulov - 9,0, J. Saidov - 9,0, A. Lupashko - 9.
Nazoratchi – A. Klepikov. 
"Navbahor": 30. Asilbek Amanov, 2. Alisher Samatov (11. Abduaziz Sultonov, 84), 5. G'iyos Komilov, 7. Oybek Qilichev (77. Azizbek Turg'unboev, 66), 9. Dilshod Jabborov, 10. Mansur Saidov, 19. Mirzhid G'ofurov, 21. A'zam Aliev, 32. Jahongir Mehmonov (33. Tohir Shamshitdinov, 57), 44. Darko Stanoevich, 84. Nemanya Yovanovich.
"Neftchi": 1. O'tkir Yusupov, 2. Sergey Kontsevoy, 5. Hamza Karimov, 8. Umidjon Qodirov, 9. Sherzod Hakimov, 11. Abbos Maxsitaliev (30. Said Abdujabborov, 77), 14. Terentiy Lutsevich, 15. Xusniddin G'ofurov, 17. Muzaffar Muzaffarov (22. Furqat Hasanboev, 79), 20. Dilyor Irmatov, 55. Dmitriy Komarovskiy (18. Javohir Rasulov, 69).
Gollar: N. Yovanovich (77, pen.) - D. Komarovskiy (41).
Ogohlantirishlar: O. Qilichev (43), A. Turg'unboev (83) - Sh. Hakimov (15), S. Kontsevoy (28), A. Maxsitaliev (52), O'. Yusupov (75), H. Karimov (76).
— deya xabar beradi uff.uz nashri.