Evropa va jahon futboli o'z yo'liga, ularning shov-shuvi shundoq ham har kuni ko'z ostimizda. Ammo, osiyolik ishqibozlar uchun juda muhim pallalar yaqinlashmoqda. Shu jumladan, o'zbekistonlik muxlislar uchun ham.
Kelasi haftada JCh-2018 saralash o'yinlari boshlanadi. Negadir, ishtaha ovqat paytida keladi deganlaridek, guruhimizning barcha a'zolari mundialga borishni yanayam istashmoqda va har bir o'yinda borlarini berishni ta'kidlashmoqda. Bu haqida Osiyo matbuoti ko'p chiqish bo'lyapti.
Bugun Qatar ommaviy axborot vositalarida chiqqan qiziq xabarga e'tiboringizni qaratmoqchimiz. Ya'ni, Qatar termasi o'zida Eron bilan o'ynaydigan kun O'zbekiston termasi Kuala-Lumpur shahrida Suriyaga qarshi maydonga tushadi. Mana shu bizning o'yinni Qatar yollagan ikkita evropalik futbol eksperti kuzatib boradi. Ularning biri germaniyalik va ikkinchisi italiyalik bo'lishi aytilgan.
Demak, ushbu mutaxassislar Suriya - O'zbekiston o'yinini bevosita stadion va TV orqali kuzatishadi. Asosiy maqsad - ikki raqibni o'rganish. Aniqrog'i, ikki jamoaning kuchsiz tomonlari tahlil qilinadi va katta material sifatida Xorxe Fosattiga taqdim etiladi. O'sha ko'rsatmalar asosida Qatar O'zbekistonga qarshi taktika tuzib chiqadi.
Buni taxmin qilish qiyin emasdi, zero Qatar ikkinchi davraga juda jiddiy tayyorgarlik ko'rmoqda. Hatto, hakamlarga ham bosim o'tkazish imkoniga ega bo'lishi mumkin, ular.
Bizni faqat puxta reja va o'z ishiga sitqidildan yondashish qutqarishi mumkin. Maydondagi yarimta e'tiborsizlik gol bilan yakunlanishi va oqibatda qiyin ahvolda qolib ketishimiz mumkin.
Shunday ekan, Babayan boshchiligidagi terma jamoamizdan jipslashishni va bir yoqadan bosh chiqarishni kutib qolamiz.
Bizning ko'chada ham bayram bo'lishi kerak.
— deya xabar beradi uff.uz nashri.