Bugun mini futbol bo'yicha XIII O'zbekiston chempionati 3-bosqich, 2-turining markaziy uchrashuvi bo'lib o'tdi. Ushbu uchrashuvda «Sevinch» Toshkentning «TATU» jamoasi bilan bahs olib bordi. Uchrashuv kutilganidek juda qiziqarli va kurashlarga boy tarzda kechdi. Asosan tajribali futbolchilardan tashkil topgan «TATU» jamoasi bugun «Sevinch» bilan durang natija qayd etgan taqdirda ham chempionlikni qo'lga kiritishi mumkin edi. Ammo bunday bo'lmadi. Jamoamiz tarkibida sezilarli o'zgarishlar ro'y berganiga qaramasdan, murabbiylarimiz futbolchilarimizni o'yinga ruhan tayyorlay olishdi. Jamoamiz o'yinda katta iroda namoyish etib, muhim g'alabani qo'lga kiritdi. O'yinda har ikkala jamoa faqat g'alaba uchun maydonga tushgani dastlabki daqiqalardan shunday sezilib turdi. Dastlabki daqiqalarda raqibimiz jamoamizga nisbatan ustunlikka ham erishdi. Ular darvozamiz oldida ko'plab xavfli vaziyatlarni yarata olishdi. Bir tomondan ularda kuchli hayajon sezilib turgan bo'lsa, ikkinchi tomondan himoyachilarimiz va darvozabonimiz juda yaxshi harakat qilishdi va darvozadan gol o'tkazib yuborishmadi. Jamoamiz ham o'z o'rnida raqib darvozasi oldida vaziyatlarda ega bo'lishdi, ammo o'yinchilarimizda gol urish uchun aniqlik etishmadi. Birinchi bo'limning so'nggi daqiqalarida tashkil etilgan hujumimiz gol bilan yakunlandi. Bu vaziyatda, raqib jamoa himoyada qo'pol xatoga yo'l qo'ydi. Oqibatda bu yildan «Sevinch»ning asosiy tarkib o'yinchisiga aylangan, Shaxnoza Qurbonova gol kiritishga erishdi – 0:1. Birinchi bo'limning qolgan daqiqalarida ham jamoalar imkon paydo bo'lgandan oldinga tashlanishdi. Lekin darvozalarga boshqa gol kiritilmadi. Ikkinchi bo'limda jamoamizda raqibga nisbatan jismoniy tomondan imkon ko'proq bo'lishi kutilgan edi. Bunga sabab, «TATU» jamoasining zaxiradan maydonga tushadigan o'yinchilari kamligi edi. Shundan kelib chiqib, talabalar jamoasi ikkinchi bo'limning boshidanoq, nafaqat hisobni tenglashtirish, balki oldinga o'tib olish payida bo'lishdi. Bu harakatlar dastlab o'z samarasini ham berdi. Sobiq jamoamiz a'zosi, tajribali hujumchi Mahliyo Sarikova oradagi hisobni tenglashtirishga erishdi – 1:1. Bu hisob jamoamiz uchun juda qaltis hisob edi. Futbolchilarimiz goldan keyin tezda o'zlarini qo'lga olishdi va shu daqiqaning o'zida yana bir marta gol urishga erishdilar. Bunda tajribali o'yinchimiz, jamoamiz sardori Kamola Risqieva o'zini ko'rsatdi, u hisobni 1:2 ko'rinishga o'zgartirdi. Ammo bu hisob ham hali g'alabani ta'minlay olmasdi. Yuqorida qayd etganimizdek, asosan tajribali futbolchilardan iborat, «TATU» jamoasi osonlikcha taslim bo'lmasdi. Bu goldan ruhlangan jamoamiz futbolchilari maydondagi ustunlikni qo'lga kiritishdi va raqibiga nisbatan bosimni oshirishdi. Natijada bu samarali yakunlandi. Uchrashuvning 35 va 36-daqiqalarida yana bir tajribali futbolchimiz Shaxzoda Jamolova «TATU» jamoasi darvozasini ikki marta ishg'ol qildi – 1:4. Bu hisob o'yin taqdirini hal qilgan edi. Shunday qilib, «Sevinch» jamoamiz futbolchilari katta iroda namoyish etishib, markaziy uchrashuvda g'alabaga erishdi. Jamoamiz endi ertaga «Paxtakor W» jamoasiga qarshi uchrashuvda maydonga tushadi. Uchrashuv soat 10:20da boshlanadi. Quyida uchrashuv qaydnomasi bilan tanishing. Mini futbol bo'yicha XIII O'zbekiston chempionati, 3-bosqich, 2-tur «TATU» (Qarshi) – «Sevinch» (Qarshi) 1:4 (0:1)
Gollar: Mahliyo Sarikova, 33′-1:1 – Shaxnoza Qurbonova, 18′-0:1, Kamola Riskieva, 33′-1:2, Shaxzoda Jamolova, 35′-1:3, 36-1:4.
«TATU»: 15.Dinara Abdurasulova, 22.Nazokat Mamatisaqova, 3.Ug'iloy Quchqarova, 4.Darina Fedosenko, 5.Mariya Moiseeva, 6.Rushaniya Safina, 9.Mahliyo Sarikova, 10.Gulnora Az'amova, 11.Gulhayo Maanaboeva.
«Sevinch»: 1.Laylo Tilavova, 16.Maftuna Jonimqulova, 8.Kamola Riskieva (s), 17.Tanzila Zarbieva, 11.Shaxzoda Jamolova, 10.Ilvina Ablyakimova, 7.Shaxnoza Qurbonova, 25.Maftuna Shoyimova, 20.Maftuna Panjieva, 27.Shodiya Tosheva, 9.Sevara Normurodova, 37.Malika Burxanova, 72.Nilufar Qudratova, 19.Oliya Axmedova.
Ogohlantirish: Mahliyo Sarikova 30, Rushaniya Safina 32.
Follar: 1-bo'lim – 5:4, 2-bo'lim – 3:1.
17.03.2017. Toshkent sh., «Yoshlik» s/a
Hakamlar: Edita Mirobidova, Nigora Muhammadieva, Husnora Jumaeva, Krisitina Sereda. Bugun shuningdek yana ikkita uchrashuv bo'lib o'tdi. «Qirq qiz» (Nukus) – «Sho'rtan Lady» (G'uzor) 1:8
«Paxtakor W» (Toshkent) – «Yuz rabot» (Toshkent) 10:1
— deya xabar beradi uff.uz nashri.