Bilsangiz kerak, Konfederatsiyalar kubogi-2017 turnirida OFK sharafini Osiyoning amaldagi chempioni - Avstraliya terma jamoasi himoya qiladi. Rossiya maydonlarida tashkillashtiriladigan turnirga tayyorgarlik ko'rayotgan «kengurular» jamoasi ishtahasi chakki emas. Xususan, «sokkeruz» bosh murabbiyi Ange Postekoglu FIFA.com saytiga bergan intervyusida bo'lajak turnirdan faqat va faqat ijobiy natijalar ko'zlayotganini yashirmadi. Uning ishonch bilan ta'kidlashicha, jamoasining Rossiyada munosib o'ynashi «yashil qit'a»da futbol nufuzi oshishiga xizmat qiladi.
- Avvalo, aytingchi, Avstraliya terma jamoasining Osiyo kubogi-2015da g'olib chiqishida nima muhim rol o'ynagandi?
- OK-2015dagi muvaffaqiyatimizni oddiygina izohlayman: hamma ishlarni qat'iy reja asosida olib  bordik. Maqtanishga yo'ymang-u, ammo men Avstraliya termasi boshqaruvini qo'lga olgan ilk kundayoq (2013 yilning noyabri)  kelajak haqida aniq tasavvurga ega edim. Deylik, Braziliya mundialiga puxta tayyorlanib, turnirda chakki taassurot qoldirmadik. Eng muhimi, JCh-2014dan so'ng jamoamiz ixtiyoridagi yoshlarga e'tibor oshirildi va ular etarlicha amaliyotga ega bo'lib, tajriba to'plashdi. Ular yordamida bemalol Osiyo chempionatida g'olib chiqishga umid bog'lasak bo'lardi. Xullas, o'ylaganlarimiz to'liq amalga oshdi va qit'a kubogini qo'lga kiritdik. Qaytaraman, mazkur muvaffaqiyat - qat'iy reja asosida olib borilgan mehnat samarasi.
- Xo'sh, mezbon sifatida yirik turnir g'olibi bo'lish «maza»si qanday ekan?
- Albatta, har qanday g'alaba, u qaerda qo'lga kiritilishidan qat'iy nazar, juda  yoqimli. Ammo tan olish kerak, o'z uyingda katta turnir bosh sovrinini yutish gashti boshqachada, baribir. Menimcha, bunday imkoniyat inson hayotida bir martagina yuzaga kelishi mumkin. Turnir doirasidagi har bir o'yin arafasida shogirdlarimga xuddi shuni qayta-qayta takrorlagandim. To'g'ri, fidoiy muxlislaring guvohligida o'ynashning o'ziga yarasha qiyinchiliklari ham bor. Ammo senda o'z iqtidoringga nisbatan ishonch hissi baland bo'lsa, har qanday bosimni engib o'ta olasan. Qolaversa, biz turnirda chiroyli futbol ko'rsatib, ko'p gol urdik. Xususan, finalda Osiyoning eng kuchli jamoalaridan biri - Janubiy Koreya termasiga imkoniyat qoldirmadik va haqli ravishda chempionlik maqomiga erishdik.
- Xo'sh, Konfederatsiyalar kubogi-2017da Avstraliya terma jamoasidan qanday natija kutsak bo'ladi?
- Tabiiyki, kelajak voqealarini oldindan aytish qiyin, ammo jamoamizning oxirgi 3 yil davomida ancha shakllangani va o'zimiz istagan futbol namoyish qilishga kirishganini nazarda tutib, faqat ijobiy natija ko'zlayapmiz. Misol uchun, so'nggi mundialda Chili, Gollandiya va Ispaniya terma jamoalari bilan bitta guruhda o'ynadik. Garchi JChdagi ishtirokni dastlabki bosqichdayoq tugatgan bo'lsak-da, bunday kuchli raqiblarga qarshi kechgan o'yinlar futbolchilarda o'zgacha ishtiyoq hissini uyg'otdi. Shu tariqa jamoamiz o'yini yanada kuchaydi. Tushunarliki, Rossiyaga Konfederatsiyalar kubogida shunchaki, ishtirok etish uchun bormaymiz. Bilamizki, futbolda ortga yo'l yo'q va har bir o'yinda g'alaba uchun oxirigacha kurashishimiz ta-  yin. Eng muhimi, shogirdlarim ruhiy tomondan katta vazifalarni bajarishga to'laqonli tayyorlar. Bosh g'oyamizga muvofiq termamiz so'nggi 3 yilda sezilarli darajada o'sdi va har qanday raqib bilan tengma-teng kurashadigan darajaga etdi. To'g'ri, endi buni amalda isbotlashimiz kerak.
- Futbol falsafangiz nimaga asoslanganini tushuntira olasizmi?
- Bu ham oddiy: shunchaki, o'zimiz istagan futbolni namoyish qilsak, bas. Zero, qo'l ostimdagi futbolchilar mahorat bobida hech kimdan qolishmaydilar. Ular maydonda faollikni ozgina oshirishsa, har qanday maqsadga etishimiz mumkin. Shaxsiy falfasamga ko'ra, futbolda ortga emas, faqat oldinga yo'l bor, xolos. Qaerda ishlashimdan qat'iy nazar, futbolchilarga avvalo, shu fikrni uqtirishga urinaman. Quvonarlisi, bu hozircha samara bermoqda.
- Avstraliya termasi qaysi sifatlari evaziga muxlislar mehridan umidvor bo'lishi mumkin?
- «Sokkeruz»ga ishqibozlik qilish uchun sabablar etarli. Deylik, tarkibimizda yosh futbolchilar ko'pligining o'zi muxlislar e'tiborini tortishi mumkin. Misol uchun, Tommi Rogichni olaylik: uni o'smirlik chog'iyoq termaga taklif etdik va ulg'ayguniga qadar qimmatli tajriba, malakani o'zlashtirdi. Umid qilamanki, tarkibimizdan joy olgan Tommiga o'xshash barcha yoshlar yaqin kelajakda to'plangan malaka va ko'nikmalardan samarali foydalanishadi.
- Jamoangiz 2018 yili Rossiyada o'tadigan JCh yo'llanmasi uchun astoydil kurashmoqda. «Sokkeruz»ning navbatdagi mundialga chiqish imkoniyatini qanday baholaysiz?
- Bu borada fikrim aniq: bo'lajak JChda ham qatnashamiz, albatta. To'g'ri, Tailand termasiga qarshi kechgan safar o'yinidan so'ng kimlardadir shubha uyg'ondi. Ammo o'sha uchrashuv natijasi - sof tasodif. Aniqrog'i, Tailandda chindan ham, o'z saviyamizga mos o'yin ko'rsatolmadik. Umuman, so'nggi saralash bosqichining dastlabki qismi termamiz uchun og'ir kechishini bilardim. Negaki, ketma-ket safarga chiqib, BAA va Saudiya Arabistoni terma jamoalaridek jiddiy raqiblarga qarshi o'ynadik. Keyin Tailandga yo'l oldik. Tabiiyki, bunday uchrashuvlarning barchasida g'alaba qozonish uchun futbolchilarning sport formalari fantastik darajada bo'lishi lozim. Muhimi, bu yilgi o'yinlarimiz o'z maydonimizda o'tadi, birgina Iroq termasiga qarshi betaraf hududda tashkillashtiriladigan bahsni hisobga olmaganda. Demak, hammasi o'z qo'limizda.
- Ma'lumki, Avstraliyada mahalliy aholi millionlar o'yiniga u qadar qiziqmaydi...
- To'g'ri, buni tan olaman. Lekin ayni payt xuddi shu qarashni o'zgartirish yo'lida astoydil mehnat qilyapmiz. Chunonchi, Avstraliya termasi yirik turnirlarda qanchalik ko'p g'alaba qozonsa, mamlakatimizda futbolga muhabbat shunchalik kuchayadi. Kim ulkan natijalarga erishishni maqsad qilsa, o'z ustida ishlashni shunchalik kuchaytirishi lozim. Umuman, futbol Avstraliyada ham tez orada birinchi raqamli sport turiga aylanishidan umidvorman. Faqat buning uchun avvalo, milliy jamoa o'yinini havas qilishga arziydigan darajaga ko'tarish kerak.
I.RAHIMOV tayyorladi
Manba: www.interfutbol.uz
— deya xabar beradi uff.uz nashri.