Azal-azaldan xalqimizning ezgu va go'zal qadriyatlarini, uning olijanob orzu-intilishlarini o'zida mujassam etib, qadim ajdodlarimizdan bizga o'lmas meros sifatida bezavol o'tib kelayotgan Navro'zi olam yurtimizda umumxalq bayramiga aylangan. Xalqimizning eng sevimli ayyomlaridan bo'lmish ushbu bayram munosabati bilan Oliy Liga startini muvaffaqiyatli boshlagan «Dinamo» jamoasi Samarqand viloyat rahbariyati va shahar hokimligi tomonidan tantanali o'tgan Navro'z dasturxoniga taklif etildi. «Dinamo» futbol klubi, viloyat futbol federatsiyasi va futbol jamoatchiligi vakillari ishtirokida o'tgan bayram tadbirida Samarqand viloyati hokimining birinchi o'rinbosari Xudoyberdiev Shunqor Farmonovich, Samarqand shahar hokimi, «Dinamo» klubi prezidenti Rahimov Vohid Sanaqulovichlar so'zga chiqib, O'zbekiston milliy chempionati o'yinlarini omadli boshlagan «Dinamo» jamoasini Navro'z ayyomi bilan tabriklab, Samarqand viloyati ahlini xushnud etishda davom etishlarini tiladi va o'z o'rnida viloyat rahbariyati klubni har tomonlama qo'llab-quvvatlashda davom etishini ma'lum qildi. Shuningdek, tadbirda taklif etilgan 1994 yilgi Osiyo O'yinlari g'olibi Azamat Abduraimov ham so'zga chiqib, Navro'z bayrami bilan barcha yig'ilganlarni tabriklab, jamoaga keyingi o'yinlarda ham omad yor bo'lishini tiladi. Bayramona ruhda o'tgan Navro'z bayramida samarqandlik el suygan san'atkorlar o'z qo'shiqlari bilan davraga yanada ko'tarinki kayfiyat baxsh etishdi.
— deya xabar beradi uff.uz nashri.