«Barselona» klubi tashkil etilganidan buyon shu qadar buyuk natijalar qayd etganki, yana bir tarixiy g'alabaga erishishi kim uchundir imkonsizdek tuyulsa, boshqalar bunga ishonishgandi. Asosiysi, kataloniyaliklar o'tgan hafta shu ishning uddasidan chiqdilar - Evropa Chempionlar Ligasida doirasidagi «PSJ»ga qarshi kechgan bahsda 6:1 hisobida g'alaba qozondilar. Bu jamoalar o'rtasida kechgan dastlabki uchrashuvda parijliklar 4:0 hisobida g'olib chiqib, EChL chorak finali masalasini deyarli hal qilgandek edilar. Ammo «Barselona» bunga ko'nmadi va haqiqiy mo''jiza ko'rsatdi. Ha, futbolni aynan shunday voqealar uchun sevamiz. O'zbekiston milliy terma jamoasi ham o'z vaqtida mo''jiza ko'rsatgan - 1994 yilgi Osiyo o'yinlaridagi g'alabaning nechog'li yuksak qadrga ega ekanini yillar o'tgani sari yanada ko'proq his qilib bormoqdamiz. Shundan buyon o'tgan vaqt davomida termamiz Osiyoning barqaror o'rtamiyona jamoasiga aylandi. Biz qit'a darajasidagi musobaqalarda har doim ishtirok etamiz, biroq undan ko'piga kuchimiz etmayapti. BAHOR KELGANDA... Bahor kelib, jiyda gullaydigan vaqtda bir mavzu ham ko'tariladi - jahon chempionati saralashi. Nasib qilsa, mart oyida Samvel Babayan shogirdlari Suriya va Qatar termalariga qarshi maydonga tushishadi. Saralashning so'nggi bosqichi shunday ko'rinish oldiki, bir qarashda avvaldan kutilgan taxminlar o'zini oqlayotgandek. Eron va Janubiy Koreya jamoalari guruh etakchilari bo'lib turishibdi, O'zbekiston termasi esa doimgi o'rni - uchinchi pog'onada. Shuningdek, autsayderlar borasida ham o'zgarish katta emas. Xitoyliklar so'nggi o'rinda, Qatar va Suriya jamoalari esa biroz yuqorida. Ammo shu bilan birga musobaqa jadvali biroz aldamchi taassurot qoldirayotgani ham rost. Aytaylik, azaldan autsayder hisoblangan Suriya termasining Eron va Janubiy Koreyadan ochko tortib olishini kimdir kutganmidi? Yoki milliardlarni sarflayotgan Xitoy o'z maydonida Qatarni enga olmaganini-chi? O'zbekiston milliy jamoasi yaqin kunlarda aynan mana shu ikki termaga qarshi maydonga tushishi lozim. Qatar va Suriya shu vaqtga qadar beshtadan o'yin o'tkazishdi, ammo hamon «sirli tulpor» nomini saqlab qolishayotgani ham ayni haqiqat. Xo'sh, 24 va 28 martda bo'lib o'tadigan bahslardan nima kutish mumkin? Hozir shu haqida.  SURIYa Guruhdagi o'rni: 4 O'tkazgan o'yinlari: O'zbekiston - Suriya - 1:0 Suriya - Janubiy Koreya - 0:0 Xitoy - Suriya - 0:1 Qatar - Suriya - 1:0 Suriya - Eron - 0:0 Suriya termasi qayd etgan natijalarning o'ziga xos tomoni shundaki, u guruhning har ikki etakchisidan ham ochko tortib olishning uddasidan chiqa olgan yagona jamoa bo'lib turibdi. Qizig'i, aslida saralash boshlanishi arafasida suriyaliklarga qarshi turishi ko'zda tutilgan faktlar endi ularning foydasiga ishlamoqda. Aytaylik, bu terma saralash bahslarini o'z uyida o'tkaza olmaydi. Hatto uni qabul qiladigan davlatni ham uzoq qidirdi. Ammo vaziyat yakunda shunday ko'rinish oldiki, Malayziyaning Paroi shahridagi stadion suriyaliklar uchun juda omadli keldi. Aslida ham shunday bo'lishi kerakdir, chunki notekis maydon odatda himoyaviy o'yin ko'rsatadiganlarga qo'l keladi. Suriya termasi esa aynan shunday jamoa hisoblanadi. Ko'pincha hatto hujumdagi etakchi Umar Harbinning ham himoyada yurganini ko'rganmiz. Samvel Babayan shogirdlari 23 martda aynan mana shu raqibga qarshi maydonga tushishlari lozim. Uchrashuv Malayziyadagi ancha mashhur bo'lib ulgurgan o'sha maydonda o'tkaziladi. Toshkentda kechgan bahsni eslasak, O'zbekiston termasi ancha muammolarga duch kelgandi. Hujumdagi harakatlar mutlaqo qovushmagan va faqat Aleksandr Geynrixning zaxiradan maydonga tushirilishi o'yinni qutqarib qolgandi. O'zbekiston milliy jamoasi Malayziyada Eron va Janubiy Koreya termalari uddalay olmagan ishni bajarishi lozim. Bu ish Babayan shogirdlari uchun oson kechmasligi turgan gap. Masalan, Eron o'ynagan kuni Paroida kuchli yomg'ir yoqqandi. Malayziyada yilning 200 kuni yog'ingarchilik ostida kechishini inobatga olsak, 23 martda ham ob-havo ancha noqulay kelishi hech gap emas. Samvel Vyacheslavovich boshchiligidagi murabbiylar shtabi aynan shu narsaga tayyor turishi lozim. Bu hali hammasi emas davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.