1994 yili braziliyaliklar jahon chempionati finaliga qadar etib borib, italyanlarni mag'lub etishgan, 1998 yili esa ularning o'zini Zidan va uning do'stlari dog'da qoldirishgandi. 2002 yili esa ular finalda Oliver Kan darvozasiga ikkita gol urishgan va futbol tarixida birinchi bo'lib, beshinchi marotaba jahon chempioni nomini qo'lga kiritishgan. Keling, futbol olamidagi eng quvnoq va qiziqarli terma jamoa haqida suhbatlashaylik. Asrlar kesishgan davrda Braziliya futboli unchalik yaxshi davrni boshidan o'tkazmayotgandi. 90-yillarda terma jamoa qatorasiga ikki marta jahon chempionatlari finaliga chiqqan bo'lishiga qaramay 2002 yilgi jahon chempionatiga qadar mahalliy futbolchilarni omadsizlar va tentaklar, deb atashardi. Bunga o'ziga xos sabablar bor edi, albatta. Birinchidan, 1998 yilgi jahon chempionati finalidagi Frantsiyadan olingan qaqshatqich zarba. Ikkinchidan, jamoa namoyish etib kelgan zerikarli o'yin muxlislarni ranjitardi. Uchinchidan, milliy terma jamoa ustozlarini birin-ketin almashtiraveradigan mamlakat futbol federatsiyasidagi tushunarsiz holat. Braziliyalik fanatlar 1998 yilgi Parij finalidan so'ng boykot e'lon qilishdi va uch yil davomida termani Leao (terma jamoani yarim yil davomida boshqargan), Kandino (undan ham ozroq fursat) va qattiqqo'l konservator Lushemburgo boshqargan kezlari faqat hushtakbozlik bilan kutib olishardi. Nihoyat 2001 yili terma boshqaruviga mahalliy chempionat yulduzi, «Gremio», «Palmeyras» va «Krisiuma» jamoalari bilan zafar quchgan Luiz Felipe Skolari keldi. Jamoa Skolari boshqaruvida Amerika kubogiga yo'l oldi. Hamma Braziliya termasining avvalgi saviyada o'ynashini ishtiyoq bilan kutib turardi. Braziliya esa chorak finalda Gondurasga yutqazib, sharmandalarcha ortga qaytdi. Braziliyalik fanatlar tribunada o'tirganlaricha ko'z yosh to'kishgandi. Skolari esa uni Ginnes rekordlar kitobiga kiritish mumkinligini, chunki u «Gondurasga yutqazganini» aytgandi. Muxlislarning nima uchun termadan hafsalalari pir bo'lganini tushunish qiyin emasdi. Futbolchilar nafaqat Amerika kubogida, balki jahon chempionati saralash bosqichida ham «qo'l uchida» o'ynashardi. Boz ustiga mamlakatning eng kuchli hujumchisi safdan chiqqandi. Turnir boshlanishiga bir yarim yil qolganida Ronaldo jon-jahdi bilan jarohatidan forig' bo'lishga harakat qilar va rafiqasi Milen va yangi tug'ilgan o'g'lini deyarli ko'rmasdi. Milen hatto hazil aralash kibermavjudot bilan yashashini aytgandi. Darhaqiqat Ronaldo o'shanda mashg'ulot zalidan deyarli chiqmasdi. Jurnalistlar hujumchidan jahon chempionatiga qadar sport formasini tiklay olish-olmasligini so'rashsa u to'ng'illaganicha «Men robot emasman», deb javob berardi. Bundan tashqari Ronaldoni «Inter» ustozi Marchello Lippi ham asabiylashtirardi. U tarkibda Kristian Veri borligi uchun Ronalduga ehtiyoj yo'qligini aytgandi. Skolari esa boshqacha yo'l tutdi va jarohati borligiga qaramay Ronaldoni terma jamoaga taklif qildi. Keyin ko'zini operatsiya qildirish uchun bir necha haftalik ta'til so'ragani va aslida sohil bo'yida voleybol o'ynash bilan band bo'lgani uchun Romarioning xizmatidan voz kechdi. Tabiiyki, ommaviy axborot vositalarida darhol shov-shuv ko'tarildi. Romario esa maxsus matbuot anjumani tashkil qilib, ko'zida yosh bilan hech qachon murabbiyni aldamaganini ta'kidladi. Bu ishga hattoki mamlakat prezidenti Fernando Kardozo aralashib, Luiz Felipedan Romarioni termaga jalb qilishini iltimos qildi. Biroq Skolari aytganidan qaytmadi. Natijada Romario mag'lubiyatini tan oldi va terma jamoa o'yinlarini hatto televizor orqali ham tomosha qilmasligini aytdi: «Jahon chempionatida o'yinlar tonggi oltida boshlanadi. Men bu vaqtda uyga endi qaytgan bo'laman». Romario bilan bo'lib o'tgan janjaldan so'ng Skolarida bitta muammo qoldi, xolos: saralash bosqichi yakuniga yaqinlashgani sari Braziliyaning jahon chempionatiga borish imkoniyati keskin yomonlashardi. Oxirgi turda mo''jiza ro'y bermaganida Braziliya mundial yo'llanmasidan quruq qolardi. Kutilmaganda raqobatchilar mag'lubiyatga uchrashdi. Braziliya esa Rivaldo va Luizaoning sa'y-harakatlari natijasida Venesuelani mag'lubiyatga uchratdi va muxlislarni tunggi uyqusizliklardan qutqardi. Nihoyat hammasi joyiga tushdi: Ronaldo safga qaytdi, Ronaldino ulg'aydi, 30 yoshli Rivaldo esa hamon ajoyib sport formasida edi. Three R’s, uchchovlonni matbuotda shunday deb atashardi, samolyotga o'tirib Osiyoga uchishdi. Shu tariqa Skolari uyiga faqat ertalab qaytadigan hujumchini unuta boshladi. Jahon chempionatining ilk kunlarida Luiz Felipe jamoani qanday qilib jipslashtirish, ruhlantirish haqida o'ylardi. Maqsadiga erishish uchun Skolari kutubxonadan qadimgi Xitoyda yashab o'tgan donishmand Sun-Tszining «Urush san'ati» degan kitobini olib keldi va uni shogirdlariga o'qib bera boshladi. Murabbiy vaqt bo'lishi bilanoq kitobdan parchalar o'qirdi. U hattoki kitobning ayrim sahifalaridan nusxa ko'paytirib, futbolchilarning xonalariga tarqatgandi. Turkiyaga qarshi o'tkazilgan ilk o'yindayoq Ronaldo boshi bilan chiroyli gol kiritdi. Ammo o'yinning asosiy yulduzi Rivaldo bo'ldi. U avvaliga golga pas berdi, so'ng o'zi penaltini aniq amalga oshirdi. Keyin turk futbolchilaridan birining zarbasidan keyin to'p uning yuziga tekkanini ifoda qilib, maydonga quladi. Natijada turk futbolchisi maydondan chetlatildi. Rivaldo esa futbol tarixida simulyatsiya uchun jarimaga tortilgan ilk futbolchi bo'ldi. o'yindan keyin ikki soat o'tgach Rivaldo 6 ming dollar miqdorida jarima to'lashga majbur bo'ldi. Uch haftadan so'ng Braziliya Turkiya bilan yana uchrashdi va bu safar ham g'alaba qozondi. «Tarkibimiz ajoyib shakllangandi: ajoyib himoyachilar, kuchli hujumchilar, – deydi Ronaldo. – Men hatto bu tarkibni 1970 yilgi tarkibdan keyingi eng kuchli Braziliya degan bo'lardim. Biz istalgan raqibni to'xtatishimiz, istalgan raqibga xohlaganimizcha gol urishimiz mumkin edi. Bu «Jogo Bonito» edi. Ammo, shu bilan birga aniq strategiyamiz mavjud edi». Aniq strategiya va «Jogo Bonito» natijasida braziliyaliklar 7 uchrashuvning barchasida g'alaba qozongandilar. Belgiya, Angliya va Germaniyani mahv etib, 18 ta gol urgandilar – bundan ko'proq Braziliya faqat 1970 (19) va 1950 (22) yillari gol urgan. Ronaldo 8 ta, Rivaldo esa 5 ta gol muallifi bo'lishgan. Ronaldino «pley-off»da faqat bir marta gol urgandi. Lekin o'sha golni hamon unuta olmaymiz. Yodda qolgan yana bir narsa – Ronaldoning soch turmagi. 2002 yili bunday soch turmagini braziliyalik har bir o'smir (ular orasida 10 yoshli Neymar ham bor edi) orzu qilardi. 2002 yilgi turnir Ronaldoni buyuklar qatoriga qo'shgan, ammo jarohatlardan forig' qilmagandi. Chempionat davomida Ronaldo qovug'idan jarohat olgandi. Jurnalistlar joniga tegmasligi uchun u sartaroshdan sochini qirib tashlashni iltimos qilgan, faqat kokilini qoldirgandi. Oqibatda o'smirlar orzu qiladigan soch turmagi yaralgandi. Final arafasida braziliyaliklar yarim tungacha hordiq chiqarishgandi. Kimdir asabiylashar, boshqa birov esa erta yotishga odatlanmagandi. Luiz Felipe mehmonxona yo'lagida futbolchilarning mini-golf o'ynashayotganiga guvoh bo'ladi. Skolari o'yinga qo'shiladi. «Ba'zida qattiqqo'l bo'lish shart emas, – deydi u. – o'sha tunda ularga oson bo'lmaganini yaxshi tushunaman. Ularga ma'ruza o'qib, uxlashga majbur qilish o'rniga ular bilan qolib, ertangi o'yinning muhim ekanligini gapirdim. Ularning golfni yaxshi o'ynashlarini aytdim. Soat ikkilarda ular uxlagani tarqalishdi. Ertalab barchalari yaxshi kayfiyatda edilar. Kechki payt esa Germaniyaga qarshi ajoyib o'yin namoyish qilishdi». G'alabadan so'ng braziliyaliklar maydon uzra bayroq hilpiratib yugurib yurishganida 30 yoshli Kafu zahira o'rindig'i yonida salanglab yurar va qora flomaster izlardi. Nihoyat maydonga sahnani olib chiqib o'rnatishgach va Braziliya terma jamoasi sardori o'z qo'liga kubokni olganida uning nima uchun flomaster izlagani ma'lum bo'lgandi. Kafu sariq-zangor futbolkaga «100 foiz Vila Iren» degan yozuvni bitgan ekan. Bu bilan u g'alabani Braziliyaning San-Paulu shahridagi o'zi tug'ilib o'sgan eng qashshoq tumanga bag'ishlaganini izhor qilgandi. Kafu o'shanda jahon chempionatlari tarixidagi qatorasiga uchta finalda ishtirok etgan yagona futbolchiga aylangandi. Braziliyaliklarning g'alabasidan keyin Rio ko'chalari va plyajlariga o'n minglab muxlislar chiqishgandi. Lekin asosiy bazm samoda sodir bo'layotgandi. «Biz Yaponiyadan to'ppa-to'g'ri Braziliyaga uchgandik. Uchish davomida birorta ham odam uxlashni xayoliga keltirmagandi, – degandi Ronaldo. – qaerdadir boshqa samolyotga o'tirishimiz kerak edi. Biroq men buni eslay olmayman. Chunki o'sha paytda bazmi jamshid avjida edi». Bazm keyingi yirik turnir – Amerika kubogida ham davom etgandi. Braziliyaliklar turnirga zaxira tarkib bilan kelishganiga qaramay finalga qadar etib borishgan va hal qiluvchi o'yinda Argentinani mag'lub etishgandi. G'alabali odim Konfederatsiyalar kubogida ham davom etgandi. Finalda yana raqib Argentina va yana bitta yirik g'alaba – (4:1). Braziliya yana hammadan kuchli edi. Konfederatsiyalar kubogida braziliyaliklar nafaqat keyingi uch yillikdagi uchinchi sovrinni qo'lga kiritishdi, balki Adriano, Ronaldino, Kaka va Robinolardan iborat bo'lgan «Sehrli Kvadrat»ni namoyish etishdi. Yangi qoidalarga ko'ra amaldagi jahon chempioni ham saralash turnirida ishtirok etishga majbur edi. Shu bois Braziliya navbatdagi jahon chempionati saralash turnirida qatnashdi. Turnir ortiqcha muammo keltirib chiqarmadi. Braziliya o'tkazilgan 18 ta o'yindan faqat ikkitasini boy berdi va Evropadagi mundialga qit'a turniri g'olibi sifatida jo'nadi. Braziliya futbol federatsiyasi va tashkiliy ishlar bilan shug'ullangan Shveytsariyaning kompaniyasi o'rtasida tuzilgan shartnomaga ko'ra milliy terma jamoa jahon chempionatiga tayyorgarlikni Tsyurix yaqinidagi Veggis shahrida o'tkazgandi. Shveytsariyaliklar bundan o'ziga xos shou yaratishdi: Braziliya termasining mashg'ulotlarini tomosha qilish uchun muxlislar 40 evrodan to'ladilar. Mashg'ulotlarni esa kamida 5 mingdan fanatlar tomosha qilishgandi. Okrugda egulik va ichimlik sotishga moslashtirilgan avtomatlar o'rnatildi. Jahon chempionlari esa Lyutsern kantoni termasi bilan o'rtoqlik uchrashuvi ham o'tkazdi. o'yin 8:0 hisobida Braziliya foydasiga hal bo'ldi. O'sha paytlari termani boshqargan Parreyraga bularning bari yoqmasdi. Chunki futbolchilar tayyorgarlik ko'rish o'rniga muxlislarga yoqishga harakat qilishar, quvnoq kayfiyat ularni bo'shashtirayotgandi. Ayrimlar umuman kayf-safo bilan band edilar. Ronaldo, Adriano va Emerson tunni Veggisdagi klublardan birida o'tkazishgan, u erda muxlislar bilan rosa suratga tushishgandi. Tabiiyki, bu suratlarning ko'pchiligi internet orqali jamoatchilikka ma'lum bo'lgandi. Braziliyaliklar Germaniyaga etib borishgach yangi mojaro ko'tarilgandi. Qaysidir gazetada «Ronaldo – mechkay» degan ma'nodagi maqola paydo bo'lgandi. Buni Braziliya prezidenti Luis Inasiu Lula da Silva o'qib qoladi va shu zahoti Parreyra bilan internet orqali bog'lanib, haqiqatdan ham hujumchi shunchalar semirib ketganmi, deb so'raydi. Bunga javoban Ronaldo gazetalarda bo'lmag'ur narsalar yozilishi mumkinligini, misol uchun mamlakat prezidenti spirtli ichimliklarni haddan tashqari ko'p iste'mol qilishi haqida ham o'qish mumkinligini aytadi. Mana shu davrda sehrgarlik poyoniga etdi, nazarimizda...   Yulduzli jamoa yulduzlari taqdiri, siz hali o'qimagan qiziqarli faktlarni maqola davomida vodiymedia.uz da o'qiysiz! 
— deya xabar beradi uff.uz nashri.