Erta o'tib, indinga O'zbekiston milliy terma jamoasi Kuala-Lumpur shahrida Suriya termasiga qarshi maydonga chiqadi. Undan besh kun o'tib esa, Toshkentda Qatar bilan o'ynaydi.
Juda muhim palla oldida turibmiz, buni hamma bilib turibdi. Butun xalqimiz termamizdan g'alabalar kutmoqda. Boshqa natijalar qabul qilinmaydi, har holda mart oyi uchun vaziyat shunaqa.
O'zbekiston futbol fedaratsiya rahbariyatiga yaqin manbalardan olgan xabarlarimizga qaraganda, O'zbekiston terma jamoasi bosh murabbiyi Samvel Babayan oldiga mana shu ikki o'yinda olti ochko olish vazifasi qo'yilgan. O'z navbatida murabbiy va futbolchilar ham buning uchun qo'ldan kelgancha harakat qilishga va'da berishgan.
Biz ham ishonamiz, termamiz nihoyat o'z muxlislarini xursand qiladi va amaldagi tanqidlarni yo'qqa chiqaradi. Termamizning hozirgi saviyasi bemalol olti ochko olishga etadi. Buning uchun xohish va iroda bo'lsa kifoya.
— deya xabar beradi uff.uz nashri.