"InterFutbol"ning o'tgan sonlarida kelajagi porloq yosh darvozabonlar e'tirof etilgandi. Bu galgi reyting esa qanot himoyasida astoydil ter to'kayotgan, zarur paytda hujumchilarga ham ko'maklashishni uddalaydigan futbolchilardan tashkil topgan. Quyida nomi qayd etilgan o'yinchilar izlanishdan to'xtashmasa, yaqin kelajakda O'zbekiston terma jamoasining muvaffaqiyatlariga munosib ulush qo'shishlari muqarrar.
5. Tohir ShAMSIDDINOV
P/S: 33 raqam
Tug'ilgan sanasi: 1993 yil 9 fevral
Klubi: «Navbahor»
Ushbu futbolchi 2013 yili Turkiyada o'tkazilgan yoshlar o'rtasidagi jahon chempionatida termamiz tarkibida porlagandi. Keyinchalik olimpiyachilarimiz safida muntazam ravishda ko'rinish bergan Shamsiddinov koreyalik tengdoshlariga qarshi bahsda asablarini jilovlay olmagandi. Uning professionallikka zid xatti-harakatlari yakunda munosib tarzda jazolandi. Bir yil muddatga futboldan chetlatilishi Tohir uchun dars bo'ldi. Chin dildan pushaymonligini bildirgach, O'FF uni kechirdi. Yarim yillik tanaffusdan so'ng yana «Navbahor»da o'z mahoratini namoyish etishni boshlagan futbolchining termamizga qaytishi foydadan xoli bo'lmasdi. Albatta, maydonda boks uslublarini qo'llamaslik sharti bilan. Aks holda, navbatdagi xato Shamsiddinovning faoliyatiga raxna solishi aniq.
4. Maksimilian FOMIN
Tug'ilgan sanasi: 1993 yil 21 sentyabr
Klubi: «Buxoro»
«Ham himoya, ham hujum» aqidasiga amal qiluvchi Fominning yana bir ustunligi - standart vaziyatlarda raqib jarima maydonchasida hoziru nozir. Uning ayniqsa, bosh bilan to'p kiritishiga ko'p guvoh bo'lganmiz. 90 daqiqa tinim bilmaydigan futbolchi hozirda «Buxoro» bilan elitada qolish masalasini hal qilmoqda. Mabodo ko'hna shaharliklar quyi ligaga tushib ketishsa, Maks jamoasini almashtirishi haqiqatga yaqin. Shunisi aniqki, u qaysi klubda to'p surishidan qat'iy nazar, terma jamoa murabbiylarining muntazam kuzatuvida bo'laveradi. Ayniqsa, Rio Olimpiadasi yo'llanmasi uchun kurashda uning xizmatlari asqotadi.
Davomi InterFUTBOL gazetasi blogida.
— deya xabar beradi uff.uz nashri.