Osiyo Chempionlar Ligasi guruh bosqich bahslarining teng yarmi ortda qoldi. Natija bizni xursand qiladigan darajada emas. O'z vaqtida bu musobaqada yurtimizdan to'rtta klub ishtirok etardi. Hozir jamoalar safi teng barobarga qisqargan - «Lokomotiv» va «Bunyodkor». Qani edi, son jihatidan bo'lgan qisqarish sifatga ijobiy ta'sir o'tkaza olganida. Yo'q, bu tomonlama ham ishlar u qadar yaxshi emas. Hozircha o'zbek klublari OChLda 18 ochkolik imkoniyatdan bor-yo'g'i 3 ochko jamg'arishdi. Afsuski, ya'ni «qaldirg'ochlar» muxlislari uchun afsuski, bu ochkolarning barchasi «Lokomotiv»ga tegishli. «Bunyodkor» esa... G'ALATI STATISTIKA Yaqinda g'alati statistikaga ko'zim tushdi, unda OChLda eng ko'p mag'lubiyatga uchragan ikki klub nomi ma'lum qilinibdi. Achinarli tomoni, mana shu ikki jamoa bizdan ekan - «Paxtakor» va «Bunyodkor». «Sherlar» Chempionlar Ligasida umumiy hisobda 87ta uchrashuv o'tkazib, 32 marta imkoniyatni boy berishgan. Xalqaro musobaqalardagi faoliyatini 2008 yilda boshlab, katta shov-shuv ko'targan «Bunyodkor» esa 78 o'yindan 30tasida imkoniyatni boy berib ulgurgan.  Bu mag'lubiyatlarning katta qismi so'nggi uch yilga to'g'ri kelishini aytmasak ham bilasiz. Statistika bo'yicha bilimimizni oshirishda davom etamiz - Sergey Lushan «qaldirg'ochlar»ni boshqargan uch yillik faoliyati davomida Osiyo Chempionlar Ligasida 15ta uchrashuv o'tkazib, shulardan birortasida ham g'alaba qozona olmadi. Mana shunisi kishini ancha ajablantirishi turgan gap. Chunki «Bunyodkor» aftidan, bu statistikadan mutlaqo xavotirga tushmayapti. Aksincha, Lushanga ishonishda davom etmoqda. Ayni paytda klub o'z oldiga qanday vazifa qo'ygani xususida aniq bir fikr bildirish mushkul. KEChA Aslida, Chempionlar Ligasidagi muammolar ancha oldin boshlangan edi. «Bunyodkor» mahoratli va tajribali futbolchilarga ko'p pul sarf-lashdan ko'ra, o'zi o'yinchi etishtirib, sotish yo'liga o'tib olgan vaqtlardan buyon biz uchun qit'a darajasidagi musobaqalardan fayz ketdi. «Qaldirg'ochlar» o'rtamiyona klubga aylangandan so'ng unga raqobatchi bo'lib turgan «Paxtakor» va «Nasaf» ham kuchli o'yinchilar etishtirishdan ma'no topmay qo'ydilar. Bir vaqtlari bu klublarda ham Markovich va Pereplyotkins singari futbolchilar o'ynardi... «Paxtakor» asosan mahalliy futbolchilar va o'rtamiyona legionerlarga ishonch bildirishi natijasida Chempionlar Ligasida mutlaqo ishtirok etmayapti, «Nasaf» esa saralashdagi o'yinlar bilan cheklanmoqda. Hozir faqat «sherlar»ning OChLda ketma-ket ikki bora yarim finalga chiqishgani-yu «ajdarlar»ning OFK kubogida zafar quchishgani bilan maqtana olamiz, xolos. BUGUN Ammo mayli, o'tmishdan gapirishni bas qilib, bugungi kun haqida gaplashsak. «Bunyodkor» bu yil ham Chempionlar Ligasida guruhdan chiqa olmaydigan ko'rinadi. Aksincha, musobaqada eng ko'p mag'lubiyatga uchrash bo'yicha statistikani yanada «yaxshilab», «Paxtakor»dan ham o'zib ketish ehtimoli ko'proq bo'lsa kerak. Buning uchun jamoada barcha «imkoniyat» mavjud - «Bunyodkor» Chempionlar Ligasi guruh bosqichida yana uchta o'yin o'tkazishi lozim. Mana shu uchrashuvlarda yutqazsa, o'zib ketadi ham. Bu hali hammasi emas davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.