Futbol bo'yicha milliy terma jamoamizning har bir uchrashuvi doim muxlislar diqqat markazida. Aslida, shundoq bo'lishi ham kerak. Chunki, bugun Malayziyaning Malakka shahridagi “Hang Jebat Stadium” o'yingohi maydoniga yigitlarimiz - O'zbekiston nomi bilan maydonga tushadilar. Futbol taxminlarni yoqtirmasada, diyorimizning turli burchaklarida yashovchi mutaxassis va muxlislardan o'yinoldi fikrlarini yig'ishga harakat qildik.
Davron Fayziev, “So'g'diyona” klubi bosh murabbiyi:
- Ushbu o'yinda Suriya termasi rasman mezbon bo'lsada, bahs ularning uyida emas, balki, Malayziyaning Malakka shahrida bo'lib o'tadi. Bu esa juda muhim jihatlardan biri. Yigitlarimizni uch ochkoga ega bo'lishini yuragim sezib turibdi. Bizning jamoa Suriyaliklardan barcha chiziqlarda kuchli. Faqat maydonga ishonch bilan tushib, dadil harakat qilishsa bo'lgani. Men termamizni g'alaba qozonishini kutyapman.
Farhodjon Atajonov, Xorazm viloyati, Gurlan tumani
- MTJ mana bu tarkibda o'ynasa yaxshi bo'lardi: Darvozada: Zuhurov. Himoya: To'xtaxo'jaev, Krimets, Ismoilov. Yarim himoya: Masharipov, Haydarov, Afonin, Ahmedov, Rashidov. Hujum: Abduxolikov, Shomurodov
O'yin neytral maydonda o'tishini hisobga olib, maydon markazini ko'lga olgan holda hujumkor o'yin ko'rsatish kerak. Suriyaliklarda o'yin amaliyoti kam degan tushuncha noto'g'ri. Baribir, ular jismoniy jihatdan biznikilardan ustunrok. Shuni hisobga olgan holda maydon markazidagi ustunlik va to'p nazorati bizga qo'l keladi.
Suriya guruhda o'tkazilgan o'yinlarda eng kam gol o'tkazgan jamoalardan biri ekanligini hisobga olsak, qanotlardan tezkor Rashidov va Masharipovni hujumga ko'shilishi keskinlikni oshiradi. Taxminim: Temurxo'ja yagona gol muallifi bo'lsa kerak.
Dilshodbek Nurmatov, Andijon
- Raqibga hurmatni saqlagan holda aytishim mumkinki, g'alabamizga shubha qilmayapman. O'ylaymanki, buning uchun jamoamizda barcha narsa etarli. Asosan hujum qilishga mas'ul bo'lgan futbolchilarimiz: Ahmedov, Rashidov, Shomurodovlar juda yaxshi formada. Qolaversa, Abduxoliqov ham Qatar chempionatida sermahsullik namoyish etyapti. Umid qilamanki, o'yinda futbolchilarimiz buning samarasini ko'rsata olishadi. Umuman olganda, g'alaba uchun yigitlarimizdan "bir bosh balandga sakrash" talab etilmaydi. O'z o'yinlarini ko'rsata olsalar va ozgina omad kifoya.
Shuningdek raqibimiz suriyalik futbolchilarning ayyorliklari va mug'ambirliklaridan ehtiyot bo'lishimiz lozim. Ishonamanki, bu jihatni futbolchilarimiz juda yaxshi biladi va yuz berishi mumkin bo'lgan, turli provokatsion nayranglarga uchmaydi. Jamoamizga chin yurakdan omad! Biz sizlarga ishonamiz!
Farhodjon Uzoqov. Farg'ona viloyati, Beshariq tumani, Qiyat qishlog'i
- Bugungi o'yindan faqat g'alaba kutayapman. Shubhasiz, bizning futbolchilarimiz Suriyadan ancha kuchli. Oldingi bosqichda safarda Filippin va Bahraynni yirik hisobda yutgandik. Suriya ham o'shalar qatori Osiyoning o'rtamiyona jamoasi. Xudo hohlasa, bugun Malayziyadan uch ochko bilan qaytamiz va 28-mart kuni Qatar ustidan g'alaba qozonib, olti ochkoni qo'lga kiritamiz. O'z navbatida Eron va Koreya shu ikki turda ochko yo'qotsa, biz uchun ayni muddao bo'lar edi.
Elmurod Ermatov tayyorladi, Andijon
— deya xabar beradi uff.uz nashri.