Har bahorda, Navro'z arafasida shu she'r va uning asosida kuylangan qo'shiq ko'ngillarni o'zgacha zavqla qitiqlaydi. Mana, senga olam-olam gul, Etagingga siqqanicha ol. Bunda tole har narsadan mo'l, To o'lguncha shu o'lkada qol. Umrida hech gul ko'rmay yig'lab, O'tganlarning haqqi ham senda. Har bahorni yig'lab-qarshilab, Ketganlarning haqqi ham senda... Radioda yana o'sha tanish tarona, qadrdon so'zlar yangraydi. Keksa futbol muxlisining ko'zlari yoshlanadi: - Tinglaganing sari tinglaging kelaveradi shu qo'shiqni! Hozir termamiz raqiblariga «Mana, senga olam-olam gol», deb hayqirgim kelyapti. Albatta, ular olgani unashmaydi, «Olmaymiz! Kerak emas!» deya qarshilik ko'rsatishadi. Navro'z taomiliga ko'ra, ularning xarxashasiga quloq solinmaydi. «Olsangiz ham olasiz, olmasangiz ham, tamom!» deya raqib darvozasi to'ldirib tashlanadi golga. Oh, oh, yigitlar, Navro'z taomilini buzmanglar! Raqib darvozasini golsiz - quruq qoldirmanglar, gol urishda himmatli bo'linglar, himmat kamarini belingizga mahkam bog'lang­lar... Otaxonning yigitlar kabi g'ayratlanishidan zavqlanamiz. Uning ajib kayfiyatini buzib qo'ymaslik uchun ehtiyotkorlik bilan so'raymiz: - Futbolchilarimiz Navro'zning bu taomilini bilishadimi? Ular sizni eshitishyaptimikan? - Bilishganda qandoq! Juda yaxshi bilishadi. Boshqalarni bilmadim, ammo «Vodiy derbisi»ni tomosha qilish uchun stadionni to'ldirgan ham bir muxlisning ko'nglidan shu o'y-xayol o'tganiga ishonchim komil. Mahallasida sumalak saylini uyushtirib, futbolchilarimizga qozon atrofida yirik g'alaba tilashni rejalashtirayotgan, allaqachon xayr-ehsonni boshlagan muxlislarni bilaman. Ochig'i, bu muloqotning to'liq tafsilotini qog'ozga tushirish mushkul. Yana qaysi yurtda bor futbolga bu qadar fidoiylarcha muxlislik qilish?! Shu so'zlarni tinglagach, Igor Sergeevga qarata «Gol ursang ham urasan, urmasang ham!» deb yuborasan kishi beixtiyor ko'zlaring olovlanib, mijjalaring namlanib. Ha, otaxon haq: futbolchilarimiz muxlislarning g'alaba ishtiyoqidagi tilak-duolarini eshitishayotgani aniq. Yo'q, eshitmaslik mumkin emas jahon chempionati yo'llanmasi uchun qilinayotgan iltijolarni. Eshitmaslik uchun qalb so'qir, quloqlar kar bo'lishi kerak. O'ylaymizki, bundaylar yo'q terma jamoamiz lagerida. Suriyaliklarga qarshi maydonda zo'rlarimiz to'p surishadi. Surganda ham xo'p surishadi. Ko'p gol urishadi. Zero, zabardast yurtning zo'rlari raqib darvozasiga zabt bilan zarba bermasalar bo'lmaydi. Buni keksa muxlis sal mahsun ohang­da ta'kidladi. Biz u kishini tushundik. Nechun keksa muxlisning boshi bir dam quyi egildi, qaroqlarida yosh yolqillandi. Hayot - futbol kabi fusunkor, ayni chog'da shavqatsiz o'yin. Ayonki, keksa muxlisning necha o'nlab birodarlari bu bahor gullarini, termamiz urajak gollarni ko'rmay boqiylik olamiga yuz burishdi. Ular ko'rmay ketgan gollarning haqqi, mas'uliyati ham bor futbolchilarimiz zimmasida. O'tganlarning armonlarini ro'yobga chiqarish tiriklarning muqaddas burchidir. Ko'tarish qiyin bo'lgan tog'dek zalvorli yuk ortilmayapti termamiz elkasiga. Hozircha futbolchilardan Osiyoning o'rtamiyona terma jamoalari ustidan g'alaba qozonish so'ralyapti, xolos. Davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.