Suriya – O'zbekiston uchrashuvi muxlislar nigohida Bu o'yinning ahamiyati qanchalik muximligi barchamizga ma'lum. O'yin oldidan barcha muxlislarda turlicha fikrlar bo'lmoqda. Aksariyat muxlislar milliy terma jamoamizni g'alaba qozonishiga ishonishmoqda. Shu sababli, fidoiy muxlislarimizni bugungi o'yin haqidagi fikrlarini bilishga qiziqdik. Jo'raev Zafar Batirovich (Andijon mashinasozlik instituti, xalqaro aloqalar bo'limi mudiri, dotsent). Malayziyaning Malakka shahridagi Hang Jebat Stadium stadionida bo'lib o'tadigan o'yinni intiqlik bilan kutayapman. Aynan shu o'yindagi g'alaba, terma jamoamizning 28 mart kungi Qatarga qarshi o'yinda ham g'alaba qozonishiga zamin bo'ladi deb o'ylayman. Lekin g'alaba qozonish oson ish emasligini tan olish kerak. Meni fikrimcha Babayan taktika tanlashda adashmasligi kerak. Ancha vaqtdan buyon Nesterov darvozada turmayapti, Sergeevni o'rniga boshqa xujumchini tushirish vaqti kelmadimikin? Xullas bunday savollar juda ko'p. Maydonda kim harakat qilsa ham faqat g'alaba qozonaylik. Bir necha marta Malayziyada bo'lganman, yilning bu vaqtida u erda nisbiy namlik o'ta yuqori darajada bo'ladi. Murabbiylarimiz barchasini xisobga olishadi va terma jamoamiz g'alaba bilan qaytishadi deb o'ylayman. Raximov Doniyorbek (Andijon viloyati, Asaka shahri) Millionlab o'zbek muxlislari kutayotgan uchrashuvning o'zbek futboli tarixidagi ahamiyati juda katta deb o'ylayman. Aslida saralashning bu bosqichidagi har bir o'yinni tarixiy desak bo'ladi. Toshkentda o'tgan Suriyaga qarshi o'yinni yaxshi eslayman, o'shanda ham terma jamoamiz juda qiynchilik bilan g'alaba qozongan edi. G'alaba qozonish qiyin ekanligini bilib turibman, lekin yigitlar axillik bilan to'p surishib, fidoiylik ko'rsatishsa o'ylaymanki, biz albatta g'alaba qozonamiz. Qayumov Nozimjon (Andijon shahri, hunarmand) To'g'risi bir oz hayajondaman, barcha qatori men ham g'alaba qozonishimizni istayman. Bu o'yinda raqibni mensimaslik, to'g'ri taktika tanlamasalik yomon oqibatlarga olib kelishi mumkin. Unutmaylik raqib ham osonlikcha taslim bo'lmaydi. Suriyalik futbolchilarni jurnalistlarga bergan intervyusini o'qib chiqdim, ular ham faqat g'alaba ilinjida maydonga chiqar ekan. Xattoki, g'alaba qozonishlariga ishonishmoqda... . Futbolchilarimizga tilagim jonini berib o'ynashsin, maydonda fidoiylik ko'rsatib, yurtimizga yorug' yuz bilan qaytishsin. Suyarov Qodirjon (Andijon viloyati, Paxtaobod tumani, shifokor) Bugungi o'yindan faqat g'alaba kutayapman, xatto durang ham bizni qoniqtirmaydi, lekin suriyalik o'yinchilarning ayyorligidan ham extiyot bo'lish kerak. Aniq ayta olaman, biz Suriyadan har jabhada kuchlimiz, faqat buni maydonda isbotlash kerak xolos. O'yinchi tanlashda va taktika tuzishda, murabbiymiz xato qilmaydi degan umiddaman. Bir tanu, bir jon bo'lib harakat qilishsa o'ylaymanki, shubhasiz g'alaba biz tomonda bo'ladi. Xayrullo VASIEV
— deya xabar beradi uff.uz nashri.