Mixail Bulgakovning so'nggi asari bo'lmish «Usta va Margarita» adibga bitmas tuganmas shuhrat keltirgan. Asar favqulodda kuchli yozilgan va uning xotimasi borasida adabiyotshunoslar, yangi janrga asos solingan, deb jar soladilar. Badkirdor gipnozchilardan talafot ko'rgan Ivan Nikolaevich asar davomida sodir bo'lgan antiqa voqealar aslida bo'lmaganini, uni ro'yolar aldaganini his qilgach, g'alati bir kayfiyatda qoladi. 2011 yilning yanvarida men terma jamoamiz ishtirokida shou ko'rgandim. Ha, futbol ko'rish baxtiga muyassar bo'lgandim. Aynan o'sha davrda terma jamoamiz ko'rsatgan «total futbol» (qo'rqmasdan shu iborani ishlatganimga ajablanmang, terma jamoamizga nisbatan qo'llash mumkin edi o'shanda) menga – og'ir soniyalarimda dalda bo'lolgan edi. Vaqt ham shamoldan tez o'tishini inobatga olsak, yaqinginada deb aytiladigan musobaqaga ham besh yildan oshibdi… O'n yillardan nariga safar qiladigan bo'lsak, o'zbek futbolida undan-da shukuhli onlar hukmronlik qilganini ko'ramiz. «Quruvchi»ning «Bunyodkor»ga aylanayotgan holati, mamlakatimizga dongdor yulduzlarning tashrif buyurishi va sal keyin o'sha yulduzlarning otaxonlaridan biri bir yil davomida yashil maydonlarimizda to'p tepib yurganiga bugun odamning ishongisi kelmaydi. Ammo o'sha voqealar bizning yurtimizda bo'lgan, ha, bo'lgan… Yanada uzoqroqqa ketamiz. 2000 yildagi o'zgarishlar. Terma jamoamiz boshiga rossiyalik mutaxassisning jalb etilishi, agalarovu maminovlar bilan boyib ketishimiz va jahon chempionati Osiyoning eng kuchli ikki mamlakatida o'tkazilishi boisidan bizda ham mundialda qatnashish imkoniyati paydo bo'lib qolgani, bunga esa bir bahyagina qolgani… hammasi yodimizda. Esdan chiqarib bo'lmaydi-da bunaqa voqealarni! Yanada o'tmishroqqa yo'l olamiz. Ha, topdingiz – Xirosimadagi g'alabamiz. Yo'q, men buni oldinlari qilganimizdek, maqtanish yo sizni allashash uchun aytmayapman. Futbolimizdagi bu hodisalarni bog'lab turgan muhim bir rishtani izlash uchun eslab o'tyapman, xolos. E'tibor bergan bo'lsangiz, har olti-etti yilda uyg'onar ekanmiz! Uyg'onishimizdan oldin tabiiyki, uxlagan yo mudragan bo'lamiz. Insonning uyg'onishiga odatda qandaydir qattiq ovoz yo uxlayverganidan zerikish sabab bo'ladi. Bizning uyg'ongan onlarimizga yaxshilab e'tibor bersangiz, undan sal oldin qandaydir sharmandali natijalar qayd etganimizni ko'rib qolasiz. Xirosimadagi afsonaviy g'alabalar yurt mustaqilligining avvalgi yillarida bo'lgani va unda futbolimiz maktabi butunlay boshqa ekanligini hisobga olsak, uning qiyosi bu taqqosda chiqmaydi, albatta. Keyingilari juda o'xshash… Livandagi Yaponiyadan qabul qilib olingan 1:8 hisobidagi qaqshatqich zarba «Paxtakor» metrosi oldidagi binoni titratib yubordi. Hammasi o'zgarib ketdi. Rahbariyatdan tortib murabbiylar shtabigacha. E, ana boring, futbolchilar armiyasi ham boshqa tarkib bilan tuzildi. O'zgarish o'zini u qadar oqlamagan bo'lishi mumkin, biroq yurtimizga futbol shukuhi qaytdi. Terma jamoamiz o'yinlari chiroyli ko'rinish oldi. Klublarimiz xalqaro maydonlarda raqiblariga munosib o'ynay boshladilar. «Paxtakor»ning asr boshlarida Osiyo Chempionlar Ligasida ko'rsatgan o'yinlari emasmi stadionga muxlislarni oqib kelishini ta'minlagan? Ha, «Peruzi»yu «Bek Tero»lar bilan kechgan bellashuvlar futbolimizdagi o'zgarishlar tufayli edi. Har doim har xil o'zgarish bo'ladi, buni bilasiz. Keyingi o'zgarishlar bir klub atrofida kechdi – «Bunyodkor». Bu butunlay o'zgacha loyiha edi. Terma jamoaga dahli bo'lmasa-da, beradigan foydalari bosh jamoamizga borib taqaladigan loyiha asta-sekin unutilayozgan futbolning qayta tirilishiga yordam berib yubordi. Rivaldoyu Vilyanuevaga qarshi o'ynab, shuning natijasida shakllangan «Paxtakor» tarkibi bir qator etakchi yigitlarni kashf etdi. Bu esa, terma jamoamizning o'yini jonlanishiga olib keldi. 2011 dagi shoumental o'yinlarimiz asoschisi Vadim Abramov edi. Bu safar futbolimizga jon kirishi oldingidek rahbariyatning o'zgarishi bilan emas, chet eldan kelgan futbolchilar hisobidan emas, bir klub atrofida amalga oshirilgan katta loyiha natijasida emas, bir murabbiyning futbolga bo'lgan bo'lakcha qarashlari boisida kelib chiqdi. Terma jamoa o'yini chiroylashgani va futbolchilar rohatlanib o'ynayotganidan xulosaga kelamizki, bu o'zgarish samaraliroq va tabiiyroq edi. Hay, mayli, bu davrlar ortda qoldi. Men aytmoqchi bo'lgan gap shuki... ...
Davomi «TAFSILOT.UZ» saytida
— deya xabar beradi uff.uz nashri.